Есік қаласындағы Т.Молдағалиев атындағы мәдениет үйінің алаңында Қазақстан Республикасының Мемлекеттік рәміздерінің 31 жылдығына арналған салтанатты шара өтті.

Шара барысында егеменді елдігімізді айқындайтын көк Туымыз ортаға шығарылып, аудандық полиция басқармасы, аудандық төтенше жағдайлар бөлімі, аудан әкімі аппаратының қызметкерлері, аудандық балалар мен жасөспірімдер спорт мектебі оқушылары және Есік гуманитарлық-экономикалық колледжінің студенттері салтанатты түрде Ту ұстап шеруді жүріп өтті. Кейін барлық шараға қатысушылар бір кісідей мемлекеттік Әнұранды шырқады. Сахна төріне көтеріліп, тұрғындарға мерекелік құттықтауын жеткізген аудан әкімі Алтай Досумбаев айбынымызды асырған мемлекеттік рәміздерді құрметпен ұлықтау – әрбір азаматтың парызы екенін алға тартты. «Халқымыз үшін, оның ішінде елдіктің тірегін сақтаушы өскелең ұрпақ пен оның патриоттық тәрбиесі үшін 4 маусым ерекше күн ретінде саналып, қастерленуі шарт. Өйткені, мемлекеттік рәміздер Тәуелсіздік сөзін мәдени нышандар ұғымымен ұштастыратын синонимі екені айқын», – деді аудан басшысы. Шара соңы аудан көркемөнерпаздарының концерттік бағдарлама мен көк Ту көтерген көліктер шеруіне ұласты.

Е.АСЫЛ.