Маусым айының соңғы онкүндігінде бірнеше сала қызметкерлері кәсіби мерекелерін атап өтеді. Осы қуаныш иелерінің бірі – журналистер қауымы Т.Молдағалиев атындағы аудандық мәдениет үйінде бас қосты.

Жиынға аудандық мәслихат төрағасы Бекет Ахметов, ішкі саясат, мәдениет және тілдерді дамыту, спорт бөлімі басшысының орынбасары Ермек Самсыбеков қатысып, төртінші билік иелерін төл мерекемен құттықтады.

– Билік пен қараша халық арасына алтын көпір орнатып, дәнекер бола білген журналистер қауымына құрмет ерекше. Десек те, аудандағы бұқаралық ақпарат құралдарының материалдық-техникалық базасын нығайтып, сала өкілдеріне жағдай жасауды да ұмытпауымыз қажет, – деген Бекет Төлегенұлы алдағы уақытта аудандағы мерзімді басылымдарға қолдау көрсетілетінін айтты. Сонымен қатар, журналистерді құттықтап, аудан әкімінің Алғыс хатын табыстады.

Жиын барысында сөз алған «Еңбекшіқазақ» газетінің бас редакторы Хайролла Ахметжанов, «Уйғур авази» газетінің тілшісі Рашида Рахманова әріптестеріне ізгі тілектерін жеткізді.

Өз тілшіміз.