Қалада құрылыс нысандары қарқынды жүргізіліп жатыр. Халық игілігі үшін салынып жатқан нысандарды мәслихат депутаттары аралап, жұмыс барысымен танысты.
Бөлінген қаражаттың мақсатты және тиімді пайдалануын, құрылыс барысы мен сапасын, аяқтау мерзімін қадағалап, заңға сәйкестігін тексеру мақсатында арнайы жұмыс тобы құрылған болатын. Осы мақсатта аудандық мәслихаттың төрағасы Бекет Төлегенұлы бастаған жұмыс тобы өткен аптада Есік қаласында салынып жатқан нысандарды аралады. Жұмыс тобында мәслихат депутаттары Ш.Касымбаева, А.Габ-саттарова, М.Хасенов, Б.Жантасов және Есік қаласының әкімі А.Аңсатбаев пен тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің өкілдері болды. Алдымен қаладағы 1-ші және 2-ші ықшам ауданындағы үйлердің абаттандыру жұмыстарымен танысып шыққан жұмыс тобы нысанға жауапты мердігерлермен жүздесті. 3-ші ықшам ауданындағы шағын футбол алаңы мен балалар ойын алаңының құрылысымен танысып шыққан депутаттарға нысанның қазан айында пайдалануға берілетінін қала әкімі А.Аңсатбаев айтып өтті. Ынтымақ, Болашақ көшелеріндегі жөндеу жұмыстары 70 пайызға аяқталған. Тамыз айының соңына дейін пайдалануға берілетінін мердігер мәлімдеді. Сонымен қатар, 4-ші ықшам аудандағы БМҚ құрылысы, Ш.Уәлиханов көшесінің жөндеу жұмысы, ПМК аумағы мен Есік өзені бойын абаттандыру жұмыстары, Грушевая көшесіндегі көпірдің ағымды жөндеуі және Райымбек батыр мектебі жанындағы шағын футбол алаңының құрылысы мен Мәлкеев көшесіндегі жаяу жүргіншілер жолын жөндеу жұмыстарының жүргізілу барысын жұмыс тобы аралап, танысып шықты. Өз кезегінде мәслихат төрағасы Бекет Төлегенұлы мердігерлерден нысанға қанша жұмысшы тартылғандығы олардың жалақысы жайында сұрап қана қоймай, жұмыстарына сәттілік тілеп, нысанды сапалы салып, жауапкершілікпен уақытында аяқтауды тапсырды. Байқағанымыз, қаладағы құрылысқа жауапты тұлғалар жұмылдырылған. Салынып жатқан нысанды Б.Төлегенұлының жіті қадағалап отырғаны белгілі. Жұмыстың жай-жапсарын түгендеп, халықтың пікірін де назардан тыс қалдырмауды айтқан мәслихат депутаттары құрылыс дайын болғанда тағы аралап, қабылдап алатынын айтты. Бақылау жүргізушілер нысан құрылысының уақытында аяқталуын, бөлінген қаржының тиімді пайдалануын назарда ұстап, құрылыстың сапалы болатынына сенім артты.
Перизат ӘБДІЛ-ӘШІМ.
