Арманыңды ақтармын ба жүрегімде тербесем?
Айға сіңлі, қарындассың қасиетті Жерге сен.
Мен өзіңді теңдесі жоқ құдірет деп түсінем,
Сендік қуат мың есе артық Жердің тарту күшінен.
Иә, ақын Төлеген Айбергенов жырлағанай, теңдесі жоқ құдірет иесі – аналар бір қолымен бесікті, бір қолымен әлемді тербеген асыл жандар. Ұлттың ұйытқысы, отбасының берекесі болған аналарды қанша құрметтесек те артық етпейді. Осы орайда, халықаралық әйелдер күні қарсаңында Т.Молдағалиев атындағы мәдениет үйінде «Ұлы әнімсің, жұмағымсың – анашым» атты мерекелік шара өтті.
Хор ұжымы «Ана» әнін шырқап, жиналған әйелдер қауымына гүл шоқтарын тарту етіп, естелік суретке түсті. Аудан әкімінің орынбасары Ертай Нұрмаханов қыз-келіншектер мен ақ жаулықты аналарды мерекемен құттықтады.
– Халқымызда «Жәннат – ананың табанының астында» деген қанатты сөз бар. Өмірге ұрпақ әкеліп, тәрбиелеп, тіршілікке тірек болған асыл мұрат-тарыңыз мен қажыр-қайраттарыңыз үшін сіздерге әрдайым құрметпен қараймыз.
Қай салада болсын айналасына шуақ төгіп, тындырымды ісімен қызметін адал атқарып жүрген әйелдер баршылық. Олар қызметтің бел ортасында жүріп, мәселе шешуде салмақты ой мен жауапкершілік жүгін қоса арқалайды. Сондықтан да, еліміздің әйел қауымына қам-қорлығы мен қолдауы үнемі күн тәртібіндегі негізгі мәселе. Бүгінде өңірімізде көпбалалы аналарымыз 3811-ге жетті. Әйел-ана – біздің қоғамда әрдайым қадірлі тұлға. Әйелдің жүрегі – әлемнің тірегі, көктемнің гүліндей құлпырып, әсемдік пен әділдіктің иесі болып, бақытты да баянды өмір кешіңіздер. Осы ерекше қасиеттеріңіз мәңгілік салтанат құрып, елімізге ырыс-құт дарысын. Бүгінгі мереке махаббаттың нәзік үнімен жалғасып, пәк сезім серпілісімен ұштаса берсін, – деп Ертай Сұлтанәлиұлы, мереке иелеріне ақ тілегін арнады.
Мерекелік концерт барысында «Серілер» тобы «Қазақ қызы», Айнұр Бақытжанқызы «Қыздарға әсемдік жарасады» және Нұртас Қайратұлы «Ләйлімсің» әндерін шырқап, көпшіліктің қошеметіне бөленді. «Улыбка» би ансамблі балалар гимнастикасын орындап, жұртшылықты тәнті етті. Еркежан Хуанышқызы мен Тамара Хуаныш «Әйел бақыты» атты әсем әнмен кешті қорытындылады.
Айерке МЕРЕКЕҚЫЗЫ.
