Жыл өткен сайын Наурыз мейрамы елімізді мекендеген ұлт пен ұлыстардың сағынып күтетін ортақ мерекесіне айналып, жарасымды сән-салтанатымен түрлене түсуде.

Осы орайда Т.Молдағалиев атындағы аудандық мәдениет үйінің алаңында Ұлыстың ұлы күні – Наурыз мерекесі аталып өтті. Іс-шараға облыс әкімі Марат Сұлтанғазиев, облыстық мәслихат төрағасы Талғат Байеділов, «АМАNАТ» партиясы Алматы облыстық филиалының төрағасы Қуат Байғоджаев, аудан әкімінің орынбасары

Ертай Нұрмаханов қатысып, аудан тұрғындарының қуанышымен бөлісті.

Салтанатты кеште сөз алған  Марат Сұлтанғазиев аудан тұрғындарын жыл басымен құттықтап, ізгі тілегін жеткізді.

– Әз-Наурыз – халқымыздың болмысын айшықтайтын, күн мен түн теңелетін, жарықтың қараңғыны, жылының суықты, ақтың қараны жеңер жақсы-лықтың мейрамы. Мемлекет басшысы Қасым-Жомарт Тоқаев ел бірлігін нығайту, қоғамды ұйыстыру жолына баса назар аударуда. Соған сәйкес елімізде биылдан бастап «Нау-рызнама онкүндігі» тойланатын болды.  Әр күнге жеке атау беріліп, оның мазмұнына сай іс-шаралар ұйымдастырылады. Жыл сайын Еңбекшіқазақ ауданының әлеуеті артып келеді. Бірнеше әлеуметтік және спорт нысандары іске қосылды. Осы орайда аудан жұртшылығына Отанымыздың дамуына, облысымыздың гүлденуіне қосқан үлесі үшін алғыс білдіремін – деді Марат Елеусізұлы.

Концерттік бағдарлама барысында ару қыздар мың бұрала билеп, мереке көркін асырды. Ал ақ жаулықты аналар шашу шашып, елге бақ пен бірлік тіледі. Мерекелік шарада ұста Дәркембай Шоқпаров атындағы қолөнер музейі мен «Жеті қазына» құсбегілер мұражайының көрмесі, көненің көзіндей болған жәдігерлері көздің жауын алды. Сонымен қоса өңіріміздегі этномәдени орталықтардың көрмесі де көпшіліктің назарына ұсыныл-ды. Ұлттық нақыштағы киім киген бозбалалар мен бойжеткендер алтыбақан аясын әнге бөлесе, боз кілемде белдес-кен балуандар шын мықтыны анықтады.

Айерке МЕРЕКЕҚЫЗЫ.