8 сәуір күні республика бойынша «Таза Қазақстан» экологиялық акциясы бастау алды. Ауқымды экологиялық науқан бес аптаға созылып, оның әр аптасы белгілі бір тақырыпқа  арналды.

Осы акцияға Шелек тарихи-өлкетану музейі қызметкерлері де белсене  атсалысты. 11 сәуір күні Мемлекет басшысының тапсырмасына сәйкес, Алматы облысындағы «Таза Қазақстан» республикалық экологиялық акциясының бастау алуына орай, Шелек тарихи-өлкетану музейінде «Таза өлке күні» атты тақырыпта іс-шара өтті. Іс-шарада музей ауласындағы ағаштарды ақтау, арам шөптерді жұлу, гүл егу және музей құрылысын тазалау жұмыстары жүргізілді.

Акцияның екінші аптасы «Киелі мекен» апталығына сәйкес, музей қызметкерлері Шелек ауылындағы А.Шымболатов атындағы саябақта, Ұлы Отан соғысы, Ауған соғысы, Чернобль апатының ерлеріне арналған ескерткіштердің аумағында тазалық жұмыстарын жүргізді.

«Жасыл аймақ» жобасы аясында музей ауласына ағаш көшеттері отырғызылды. «Өнегелі ұрпақ» күнін атап өту мақсатында, Шелек ауылында тұратын Еңбекшіқазақ ауданының құрметті азаматы, педагог, Шелек тарихи-өлкетану музейінде ұзақ жыл басшылық қызмет атқарған зейнеткер Жетпіс Сыдықбаевтың шаңырағына арнайы барып, ауласында тазалық жұмыстарын жүргізді.

 «Мөлдір бұлақ» күні аясында, Шелек ауылының сыртынан ағып жатқан үлкен арнаға қосылатын бастауларды тазалау жұмыстары қолға алынды. «Бұлақ көрсең көзін аш» деген қазақтың тәмсілін ұстаным еткен музей қызметкерлері арна бойын жағалап жүріп, көздері бекітілген бастаулардың қайнарын тазалап, маңайына тасталған қоқыстарды жиып, сынған ағаш бұталарын жағаға шығарды. Жақсы бастаманың жаршысы бола білген музей қызметкерлері алдағы уақыттарда да осы үрдісті жалғастыруға ниетті.

Жанар БОРАЛТАЙҚЫЗЫ,

Шелек тарихим-өлкетану музейінің қызметкері.