Халық пен халықты, адам мен адамды теңестіретін – білім. Елімізді өркениетке апаратын жолдың бастауында мектеп тұрады.  Мектептегі білім – барлық әлемнің  тыныс-тіршілігінің іргетасы. Сондықтан, егемен еліміздің ертеңгі нұрлы болашағы – бүгінгі мектеп оқушылары.

Ауданымызда өз бойындағы талантын түрлі білім бәйгелерінде сынап, көш басынан көрініп жүрген оқушылар көп. Солардың бірі №6 қазақ орта мектеп-лицейінің 3 сынып оқушысы Айсұлтан Дауыспек. Мектеп ішіндегі өребәйгелерге жиі қатысып, аудандық, халықаралақ байқаулардың жеңімпазы атанған. «Ақбота» зияткерлік олимпиадасының І дәрежелі дипломын иеленген. Сонымен қатар, халықаралық «ПОНИ» зияткерлік байқауында І дәрежелі дипломмен марапатталған. Тек мектеп қабырғасында емес, отбасында да, достарының арасында да белсенді. Әсіресе, шахмат ойынына деген қызығушылығы зор. Анасы Айым баласының бойындағы ерекше қабілетін байқап, түрлі жарыстарға қатыстырғанын айтты.

– Айсұлтан кішкентай кезінен әріп танып, оқуға құштар болып өсті. Бос уақытын тиімді пайдаланады. Жеке заттарына ұқыпты. Мектептен келген соң бірден үй тапсырмасын орындап, шығармашылық жұмыспен айналысады. Сыныбындағы үздік оқушылардың бірі. 2 сыныпты жаңадан бітірсе де, біраз жетістіктерге жетті. Айсұлтанды түрлі онлайн байқауларға да қатыстырып келемін. Әрдайым мұғалімдері мақтап отырады. Әрине, баланың жетістікке жетуі – кез келген ата-ана үшін қуаныш. Шахмат ойнағанды қатты ұнатады. Ауызша сабақтарға өте жақсы. Құрастырма ойыншықтардан әртүрлі пішіндер құрастырады. Алдағы уақытта ұлымды көптеген үйірмелерге қатыстырып, қызығушылығын арттырамын, – дейді Айым Рахатқызы.     

 «Ерім дейтін ел болмаса, елім дейтін ер қайдан болсын» демекші, таудай талап пен теңіздей білімді бойына сіңірген кішкентай Айсұлтан болашақта ел үшін туған ер болары сөзсіз. Жақсылыққа жетелеген ұстаз бен ата-ананың үмітін ақтап келе жатқан бүлдіршініміздің шығар шыңы көп болғай...

Айерке МЕРЕКЕҚЫЗЫ.