Дарынды оқушылар – ел болашағы, келешегіміздің келбеті. Білім бәсекесінде биіктен көріну, мақсатқа қол жеткізу – озат оқушының арманы. Осыдан бірнеше ғасыр бұрын хан Абылай білектінің заманы өтіп, білімнің заманы келетінін айтса, хакім Абай «Білімдіге дүние жарық, білімсіздің күні ғаріп» деп өшпес өсиет қалдырды.

Балалар күні қарсаңында бабалардың осындай өсиетін бойына сіңірген, Ақши ауылындағы Бөлек батыр атындағы орта мектептің 4 сынып оқушысы Мансұр Мадиярұлы мақаламызға арқау болмақ. Ерекше қабілетімен танылып келе жатқан оқушы сан мәрте аудандық, облыстық, республикалық олимпиадалар мен байқаулардың жеңімпазы атанған. Соның ішінде «Talim Group»  біліктілікті арттыру орталығы мен «Мұғалім Мерейі» педагогикалық журналының ұйымдас-тыруымен өткен «Жарқын болашақ» атты шығармашылық байқауының І дәрежелі дипломының иегері атанған. Сондай-ақ «Bilim-orkenieti» инновациялық ғылыми-зерттеу орталығының ұйымдастыруымен өткен «ХХІ ғасыр көшбасшысы» байқауына қатысып, «ХХІ ғасыр көшбасшысы» атағын алып, куәлігін иеленген. «Жас математик»  жүлделі жарысының және мектепішілік  өребәйгелердің бірнеше мәрте жеңімпазы атанған.  Сынып жетекшісі Мансұрдың бойындағы ерекше қасиетін айтып, жетістіктерін атап өтті.

– Мансұр – өте зерек оқушы. Сыныптың ғана емес, мектептің де абыройын асқақтатып келе жатыр.  Мектеп шараларына белсенді қатысады, оқуға деген жауапкершілігі мол.  Сынып ішінде туып жатқан қиындықтардың жедел шешімін таба біледі. Әсіресе, математика пәніне қызығады. Көптеген интеллектуалдық сайыстарға қатысып, мұғалімдердің ықыласына бөленген ерекше бала. Оқу барысында білім деңгейі өте жақсы, үздіктердің алдында. Республикалық байқаулардың жеңімпазы атанды. Әрине мұндай ерекше баланың біздің мектебімізде білім алуы – мақтаныш. Мансұрдың оқуға құштарлығын мектеп табалдырығын аттаған сәтінен-ақ байқадым. Ең алдымен осындай зерек балаға тәрбие беріп отырған апасына алғысым шексіз, – дейді Ақбота Әжек.

Бүгінгі таңда Мансұр тек пәндер арасында емес, жеке шығармашылық жұмыстарында да белсенді. «Мақсатым – білім алу, сол алған білімімді дұрыс жолда пайдаланып, ата-анамның үмітін ақтау» деген дарынды жастың талабы таудай екені көрініп-ақ тұр.