2 маусымда өткен Есік қаласы әкімін сайлауда жеңіске жетіп, тұрғындардың сенімін арқалаған Жан Бауыржанұлы Құраметов қала әкімі болып тағайындалды.

Жан Бауыржанұлы 1989 жылы Жамбыл облысында дүниеге келген. 1993 жылы Есік қаласына қоныс аударған ол 2006 жылы қазіргі А.Мәлкеев атындағы білім-инновация лицей-интернатын тәмамдаған. 2011 жылы әл-Фараби атындағы Қазақ Ұлттық университетін «Қаржы» мамандығы, 2014 жылы Абай атындағы Қазақ Ұлттық педагогикалық университетін «Құқықтану» мамандығы бойынша, 2021 жылы Қазақ ұлттық аграрлық зерттеу университетін «Жеміс-көкөніс шаруашылығы» мамандығы бойынша бітіріп, 2022 жылы аталған университеттің «Бизнес және басқару» магистрі атанған.

Ж.Құраметов лауазымды мемлекеттік қызметте еңбек еткен. 2016-2017 жылдары Жаңашар ауылдық округі әкімінің орынбасары, ал 2017-2022 жылдары Жаңашар ауылдық округінің әкімі болған. 2022 жылы Еңбекшіқазақ ауданының тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы қызметін атқарған.

Қаламыздың гүлденуі жолында білімі мен тәжірибесін, күш-жігерін жұмсайтынын айтқан жаңа әкім тұрғындардың өзіне артқан сенімін ақтайтынын жеткізді.

Өз тілшіміз.