Аудан жұртшылығы Лавар ауылында орналасқан қуғын-сүргін құрбандарына арналған ескерткішке гүл шоқтарын қойып, құрбандардың рухына тағзым етті. Шараға аудандық мәслихат төрағасы Бекет Ахметов қатысты.

– Бүгін – халқымыздың тарихындағы «тар жол тайғақ кешкен» тақсыретті кезеңдерде талайды сарсаңға салып, қасірет шектірген қуғын-сүргін және ашаршылық құрбандарын еске алу күні.

Сонау «Ақтабан шұбырынды, Алқакөл сұлама» заманынан бастап, «репрессия» жылдарына дейінгі аралықта халқымыздың осынау кең-байтақ далада жойылып кету қаупі тұрды. Тарихи деректерге сүйенсек, 1930 жылдары Кеңес одағының құрамында болған Қазақстанда 103 мың адам қуғын-сүргінге ұшыраған және 25 мың адам ату жазасына кесілген, – деген Бекет Төлегенұлы Кеңес үкіметінің тұсындағы солақай саясат жайлы әңгімеледі.

Ауыл ақсақалы Имин Насиров жазықсыз атылған азаматтарды еске алып, олардың есімдерін мәңгі ұмытпау керектігін айтты.

Жиылған көпшілік құрбандарды бір минуттық үнсіздікпен еске алып, аруақтарға құран бағышталды. Ескерткішке гүл шоқтарын қойды.

Айта кетейік, 1918 жылы мамыр-маусым айларында жиналысты желеу еткен баскесерлер ескерткіш орналасқан орында 7 ауылдың азаматтарын жазықсыз атып өлтірген.

–  2018 жылы ескерткіш тұрғызуды қолға алғанымызда осы жерді қаздық. Сонда бірнеше адамның сүйегін тауып алдық. Тарихи деректерге сүйенсек, баскесерлер осында жиналыс болады деп, тұрғындарды жиып, пулеметпен қырып тастайды. Бұл жерде балалар мен әйелдердің, қарттардың, тіпті, жылқылардың сүйегі бірге жатыр, – дейді ескерткіш тұрғызуға жетекшілік еткен Айнисахан Вайденова.

С.НҰРАДИН.