Адам өмірінің бақытын, мәнін тіпті бәрін баламен байланыстыратыны анық. Бала туралы айтар сөз таусылсын ба? Кезінде қазақтың хас батыры Бауыржан Момышұлы «Кішкентай бала-шағаның у-шуынан артық көркем сазды музыка ойлап табу мүмкін емес» депті. Халықаралық балаларды қорғау күні мерекесі аудан орталығындағы Ж.Жабаев атындағы жастар саябағында кең көлемде аталып өтті.

Мерекенің салтанатты бөлімінде аудан әкімі Талғат Ескендірұлы бүлдіршіндерді құттықтады.

– Балаларға барлық жақсы тілек жарасымды. Әр отбасында өсіп жатқан бүлдіршіндер бақыттың бал дәмін татуға міндетті. Мемлекетіміздің тарапынан жасөспірімдеріміз үшін барлық жағдай жасалып келеді. Әрбір ауылда  мектептер, спорт алаңдары мен ойын алаңдары салынып жатыр. Бұның бәрі бүлдіршіндеріміздің мықты азамат болып жетілуі үшін атқарылатын игілікті істер, – деп балаларға арналған мерекенің өтуіне атсалысқан мекемелер мен кәсіпкерлерге алғыс білдірді.

Арнайы құттықтау сөз алған аудандық білім бөлімінің басшысы Арайлым Ақсубайқызы жиылған бүлдіршіндер мен ата-аналарды құттықтап, ақжарма тілегін білдірді.

– Биылғы оқу жылын 55 448 оқушы аяқтаса, алтын белгіге 113, үздік аттестатқа 202 үміткеріміз бар. Биылғы жылы жазғы демалыспен 55 003 бала қамтылатын болады. Сонымен қатар демеушілеріміз бен кәсіподақ қорынан 2 000 бала қамтылса, «Қазақстан халқына» қорынан 385 бала мемлекетіміздің әртүрлі лагерлерінде сауықтырылатын болады, – деді білім бөлімінің басшысы.

Аталған мереке түрлі шоу бағдарламалармен, көңілді ойындармен, ән-бимен жалғасын тапты. Сондай-ақ ауданымыздағы техникалық шығармашылық және кәсіби бағдар беру орталықтарының көрмелері ұсынылды. Балаларға қуаныш сыйлау үшін өте жоғары деңгейде ұйымдастырылған мереке бүлдіршіндерге ұмытылмас күн сыйлады.                 

 Р.НАРХАНОВ.