Ұлтымыздың жаны, елдігіміздің нышаны, болмысымыздың бейнесі болған ана тілімізді қорғап, насихаттау – әрбір қазақстандықтың азаматтық борышы. Осы мақсатта еңбек етіп, мемлекеттік тілдің сойылын соғып жүрген әріптесіміз, «Еңбекшіқазақ» газеті бас редакторының орынбасары Сардарбек Нұрадин «Мемлекеттік тіл және БАҚ» тақырыбындағы облыстық байқаудан жүлделі оралды.
«Тілі жоғалған ұлттың өзі де жоғалады» деп ұлт ұстазы Ахмет Байтұрсынұлы өз заманында айтып кеткен. Солақай саясаттың салдарынан ана тіліміз бен дәстүріміз талай қиын кезеңдерді бастан өткеріп, бүгінде тіліміз өз тұғырына қонып, құндылықтарымыз түгенделуде. Осы бағытта еңбек етіп, аудандық газет арқылы мемлекеттік тілдің мәртебесін көтеріп, тіліміздің айналасындағы олқы тұстармен күресіп жүрген С.Нұрадиннің бір жыл бойы жазған мақалалары, жасаған жұмыстары арнайы комиссия мүшелерімен сараланып, жүлделі ІІ орынға лайық деп танылды.
Қонаев қаласында өткен марапаттау рәсімінде облыстық тілдерді дамыту жөніндегі басқарма басшысы Данияр Ахметов әріптесімізді мемлекеттік тіл саясатын бұқаралық ақпарат құралдарында насихаттап, мемлекеттік тілдің өзекті мәселелеріне арналған мақалалар мен бағдарламалар арқылы отандастарымыздың танымын кеңейтіп, қазақ тіліндегі контентті ұлғайтуға қосқан үлесі үшін ІІ дәрежелі дипломмен марапаттап, қаржылай сыйлығын табыстады.
Өз тілшіміз.
