Барлық мерекені, іс-шаралар мен мемлекеттік рәсімдерді мәдениет қызметкерлерінің өткізетіні белгілі. Бар уақытын халыққа арнап,
думанды мерйрамдарда өздеріне, отбасыларына көңіл бөле алмай жататын да осы саланың қызметкерлері. Сол себепті де, мәдениет қызметкерлері мен өнер адамдарына лайықты көңіл бөліп, құрмет таныту қашан да керек-ақ. 21 мамыр елімізде «Мәдениет және өнер қызметкерлері күні» мерекеленеді. Мемлекеттің даму жолында, ұлтымыздың болмысын әлемге әйгілеуде – өнер адамдарының үлесі орасан. Осы орайда аудандық әкімдіктің үлкен залында мәдениет саласының қызметкерлерін құттықтау рәсімі өтті. Шараға аудан әкімінің орынбасары Ерболат Сарабеков, аудандық мәдениет, тілдерді дамыту, дене шынықтыру және спорт бөлімінің басшысы Дархан
Ахметов, аудандық мемлекеттік қызметкерлер мен агропром кәсіподақ ұйымының төрағасы Жұман Мықыбаев және мәдениет саласының қызметкерлері қатысты.
Алғашқы мерекелік құттықтау сөзін алған Ерболат Сарабекұлы мәдениет пен өнер қызметкерлерінің қоғамдағы алар орыны ерекше екенін атап өтіп, кәсіби мерекеге сай ақ тілегін білдірді. Сонымен қатар, мәдениет саласында еңбек етіп, қызметтерін абыроймен атқарып жүрген жандарды аудан әкімі Талғат Байеділовтің алғыс хаттарымен марапаттады.
Өз кезегінде Жұман Сем-байұлы кәсіби мереке иелерінің қызметтерінің қиындығына тоқталып, еңбектерінің жемісті болуын тілеп, музыкалық қондырғы құралын сыйлады. Сондай-ақ, Дархан Бекетұлы өз ісінің үздігі бола білген бірқатар мәдениет қызметкерлеріне алғыс хаттарын табыс етті.
Шара барысында Т.Молдағалиев атындағы аудандық мәдениет үйінің директоры Бауыржан Шаяхметов мәдениет саласына қолдау танытып жүрген басшылық тарапына, ұйымшылдықпен жоғары деңгейде жұмыстарын атқара білген ұжымдастарына ризашылығын білдіріп, алғысын айтты. Болашақта тың серпін мен жағымды жаңалықтардың көп болатынын жеткізді.
Аудандық мәдениет үйінің қызметкері, танымал әнші Нұртас Қайратұлы «Ләйлімсің» атты жаңа әнін шырқап, мерекелік көңіл-күйді еселей түсті. Жиын соңында шараға қатысушылар естелікке суретке түсіп тарқасты.
Ринат НАРХАНОВ.
