Дзюдо күресі жастар арасында күн өткен сайын қарқынды дамып келеді. Бұл спорттан ауданымыздың ауыз толтырып айта алатын жетістіктері де аз емес. Үш жыл бұрын бастау алған «Алтын адам» республикалық турнирі ауданымызда тұрақты түрде өтетін үрдіске айналды. Жуырда ғана Есік қаласындағы спорт кешенінде «Алтын адам» жасөпірімдер арасындағы республикалық ашық турнир өтті.

Аталған ауқымды жарыста Алматы, Астана қалалары, Қызылорда, Атырау, Жетісу, Ақтөбе, Абай, Алматы облыстарынан келген 500-ге жуық жас спортшы өнер көрсетті. Тартысқа толы болған бәсеке әдеттегідей өте жоғары деңгейде ұйымдастырылды.

Дзюдо бәсекесінің ашылу салтанатына Еңбекшіқазақ ауданының әкімі Талғат Байеділов, Еңбекшіқазақ ауданы әкімінің кеңесшісі, облыстық самбо федерациясының вице президенті Бақытбек Сақалов, тарих ғылымдарының кандидаты Гүлмира Мұхтарова, аудандық № 1 балалар мен жасөспірімдер спорт мектебінің директоры Абай Сырғабаев қатысты.

– Спорт – мемлекетіміздің даму жолындағы стратегиялық маңызға ие ірі бағыттардың бірі. Ал, жас ұрпақты саламатты өмір салтына дағдылау –  бәрімізге ортақ міндет. Тарихта аты алтын әріппен жазылған Есік қаласындағы бүгінгі дзюдо додасының қатысушыларға берері мол деп білеміз. Болашақта байрақты бәсекелерде еліміздің намысын қорғайтын спортшылар бүгінгі жарыста жүргеніне күмән жоқ. Тәжірибелеріңізді шыңдап, биіктерден көріне беріңіздер, – деген Талғат Байеділов жас спортшыларға сәттілік тіледі.  Сонымен қатар, Гүлмира Мұхтарова құттықтау сөз алып, спорт саласының маңыздылығына тоқталып, ыстық ықыласы мен ақ тілегін жеткізді. Байрақты бәсекеге «Алтын адам» аты берілгеніне қуанышты екенін жеткізіп, Алтын адам туралы жас ұрпаққа кәделі мәліметтер айтты.

2010-2011 жылғы және 2013-2014 жылы туған жас сайыпқырандар боз кілемде өзара бақ сынасты. Үш күнге созылған белдесуде шын мықтылар анықталып, жеңімпаздар медальдармен, бағалы сыйлықтармен марапатталды.

Р.Нарханов.