Мәслихаттардың құзыретін кеңейту арқылы өңірлік саясаттың тиімділігі арта түсті. Жергілікті өкілді органдардың әкімдерге сенімсіздік білдіру тетігінің енгізілуі басқару жүйесіндегі есептілікті күшейтеді. Бұл өз кезегінде мемлекеттік аппараттың ашықтығын қамтамасыз етеді.

Мәслихаттардың бақылау және бастамашылық функцияларының кеңеюі өңірлік деңгейдегі шешімдердің сапасын арттыруға мүмкіндік береді. Депутаттар жергілікті бюджетті бекіту, әлеуметтік-экономикалық бағдарламаларды қарау және олардың орындалуын қадағалау арқылы халық мүддесінің сақталуын қамтамасыз етеді.

Әкімдерге сенімсіздік білдіру механизмі жауапкершіліктің нақты тетігі ретінде қызмет етеді. Бұл норма атқарушы билік өкілдерінің қызметін тиімді әрі нәтижелі жүргізуге ынталандырып, жергілікті мәселелерді шешуде белсенділік пен ашықтықты талап етеді.

Сонымен қатар, мәслихаттардың рөлінің артуы өңірлік саясатта қоғамдық пікірдің ескерілуіне жол ашады. Халық қалаулылары арқылы тұрғындардың ұсыныстары мен талаптары тікелей шешім қабылдау үдерісіне ықпал етеді.

Осылайша, жергілікті өкілді органдардың өкілеттіктерін кеңейту – өңірлік басқарудың сапасын көтеріп қана қоймай, есеп беретін және ашық мемлекеттік басқару жүйесін қалыптастыруға бағытталған маңызды қадам болып табылады.

СЫДЫКОВА

Назгуль Қайратовна

Аудандық маслихат депутаты