Жергілікті өзін-өзі басқаруды дамытуға қатысты нормалар өңірлердің дербестігін арттыруға мүмкіндік береді. Ауыл әкімдерін тікелей сайлау тәжірибесінің кеңеюі жергілікті деңгейдегі шешімдердің халық мүддесіне барынша сәйкес болуын қамтамасыз етеді. Бұл реформалар демократияны «төменнен жоғарыға» қарай дамыту қағидатына негізделген.
Тікелей сайлау механизмі жергілікті басшылардың халық алдындағы жауапкершілігін күшейтеді. Әкімдер өз бағдарламаларын ұсыну арқылы тұрғындардың нақты мәселелерін шешуге бағытталған бастамаларды көтереді, ал сайлаушылар олардың қызметіне баға беру мүмкіндігіне ие болады. Бұл өз кезегінде басқару сапасының артуына ықпал етеді.
Өңірлердің қаржылық және ұйымдастырушылық дербестігінің кеңеюі жергілікті бастамаларды тиімді жүзеге асыруға жағдай жасайды. Жергілікті бюджеттерді қалыптастыру мен жұмсаудағы ашықтық тұрғындардың сенімін нығайтып, қоғамдық бақылауды күшейтеді.
Сонымен қатар, жергілікті өзін-өзі басқару институттарының дамуы азаматтардың қоғамдық өмірге белсенді араласуына жол ашады. Ауыл, аудан деңгейіндегі мәселелерді бірлесе талқылау және шешу тәжірибесі азаматтық жауапкершілік мәдениетін қалыптастырады.
Осылайша, жергілікті өзін-өзі басқаруды нығайту – аймақтардың тұрақты дамуын қамтамасыз етіп қана қоймай, бүкіл ел көлемінде демократиялық қағидаттардың тереңдей түсуіне негіз қалайды.
БАЙШЕКОВ
Эрлан Ильдарович
Аудандық маслихат депутаты
