«Әділетті және Прогрессивті Қазақстанның Халықтық Конституциясы үшін» жалпыұлттық коалициясы аудандық мүшелері Шелек ауылдық округінің ақсақалдар ұйымының төрағасы Әбілбек Айтақынов, аудандық қоғамдық кеңесінің мүшесі Қуат Дүйсебаев, мектеп директоры Жұлдыз Абдыкадырова және аудандық мәслихат депутаттары Сайра Базылбекова, Камшат Қарағұлова мен Ринат Беков Шелек ауылының мәдениет үйінде тұрғындармен кездесу өткізді.
Жиында республикалық референдумға ұсынылатын жаңа Конституция жобасының негізгі бағыттары жан-жақты түсіндірілді. Коалиция мүшелері Президенттің бір реттік жеті жылдық мерзімі, партия мүшелігіне шектеу, кадрлық шешімдерді Құрылтай келісімімен қабылдау және билік тармақтарының теңгерімі мәселелеріне тоқталды.
Жаңа Конституциядағы білімнің, ғылымның және инновацияның құндылықтары туралы, ең алдымен адамға басымдық беріліп, мемлекеттің басты байлығы жер қойнауындағы ресурстар емес, білімді жас ұрпақ екені айқындалғаны, бұл – Президент қолға алған ауқымды өзгерістердің алтын арқауы болатыны айтылды. Жаңа Конституция жобасы саяси жүйе архитектурасын қоғамның жаңа сұранысына сай түбегейлі қайта жаңғыратынын тілге тиек етті.
Жаңа Ата Заң – осы іргелі реформалардың шырқау шыңы, бұл – Президенттің жылдар бойғы ой толғанысының жемісі, халықтың мұң-мұқтажы, талап-тілегі мен үміт-сенімі ұштасқан тарихи құжат екені әрі жаңа Конституция халықпен бірге жазылғаны баса айтылды. Тұрғындарды 15 наурыз күнгі референдумға түгел қатысуға шақырды.
Өз тілшіміз.
