«Әділетті және Прогрессивті Қазақстанның Халықтық Конституциясы үшін!» коалициясының мүшелері Еңбекшіқазақ ауданы, Ават ауылындағы О.Мұхамади атындағы орта мектептің педагогикалық ұжымымен кездесу өткізіп, 15 наурызда өтетін республикалық референдумға шығарылған жаңа Конституция жобасының негізгі ережелерін түсіндірді.

Кездесу барысында коалиция мүшелері ұсынылып отырған жаңа редакциядағы маңызды өзгерістерге тоқталды. Атап айтқанда, Президенттің бір реттік жеті жылдық мерзімге сайланатыны және қайта сайлану құқығына ие болмайтыны айтылды. Сонымен қатар, мемлекет басшысы өз өкілеттігі кезеңінде саяси партия мүшесі бола алмайтыны, ал оның жақын туыстары саяси мемлекеттік қызметтерді атқара алмайтыны биліктің шоғырлануына жол бермейтін маңызды құқықтық тетік екені түсіндірілді.

Коалиция өкілдерінің айтуынша, жаңа Конституция жобасының басты мақсаты – билікті жеке тұлғаның қолына шоғырландыру емес, керісінше оны институционалдық тұрғыдан шектеу арқылы тиімді басқару жүйесін қалыптастыру. Бір реттік жеті жылдық мерзімнің өзгертілмейтін қағида ретінде бекітілуі биліктің тұрақтылығын қамтамасыз етіп, әділетті саяси жүйені қалыптастыруға бағытталған маңызды қадам екені атап өтілді.

Сонымен қатар кадрлық шешімдерді Құрылтай келісімімен қабылдау тетігінің енгізілуі мемлекеттік басқарудағы тепе-теңдік пен жауапкершілік қағидаттарын нығайтатыны айтылды.

Кездесу барысында педагогтар өз пікірлерін білдіріп, жаңа Конституция жобасында ұсынылған өзгерістер мен толықтырулар елдің демократиялық дамуына бағытталған маңызды бастама екенін атап өтті. Ұжым өкілдері алдағы референдумның тарихи маңызға ие екенін айтып, әр азаматтың ел болашағына бейжай қарамай, белсенді азаматтық ұстаным танытуы маңызды екенін жеткізді.