«Әділетті және Прогрессивті Қазақстанның Халықтық Конституциясы үшін!» жалпыұлттық коалициясының мүшелері Еңбекшіқазақ ауданындағы М. Горький атындағы орта мектептің педагогикалық ұжымымен кездесу өткізіп, 15 наурызда өтетін республикалық референдумға шығарылған жаңа Конституция жобасы жөнінде кеңінен әңгіме өрбітті.
Жиын барысында коалиция өкілдері конституциялық реформаның негізгі бағыттарын түсіндіріп, ұсынылып отырған өзгерістердің елдегі саяси жүйені жаңғыртуға бағытталғанын атап өтті. Атап айтқанда, Президенттің өкілеттік мерзімін бір реттік жеті жылмен шектеу, оның өкілеттігі кезінде саяси партия мүшесі болмауы және жақын туыстарының саяси мемлекеттік қызметтерге тағайындалмауы сияқты нормалар биліктің ашықтығы мен теңгерімін қамтамасыз етуге арналған маңызды қадам екені айтылды.
Сондай-ақ жаңа Конституция жобасында мемлекеттік басқару жүйесіндегі жауапкершілікті арттыру, билік тармақтарының тепе-теңдігін сақтау және қоғамның саяси процестерге қатысуын кеңейту мәселелеріне ерекше назар аударылғаны атап өтілді.
Кездесу барысында мектеп ұжымы өз ой-пікірлерін білдіріп, ұсынылып отырған өзгерістердің ел болашағы үшін маңызды екенін айтты. Педагогтар алдағы референдумның маңызына тоқталып, мұндай тарихи кезеңде әр азаматтың белсенділік танытуы қажет екенін жеткізді.
