Мойындайды қай адам да,

Қарсы келмес ешкім де.

Лайықсыңдар аялауға,

Үш  жүз  алпыс  бес күнде,  –  деп ақындарымыз жырлағандай, ұлтымыздың ұйытқысы болған аналарымызға, ағаларымыздың сүйіктісі болған жеңгелерімізге, аяулы болған ардақты әпкелерімізге, бақ-беделіміз болған аруларымызға жақсылық пен құрметтің барлығы жарасымды. Мереке қарсаңында аудандық Т.Молдағалиев атындағы мәдениет үйінде мерекелік кеш өтті. Әйелдер қауымы үшін арнайы ұйымдастырылған ауқымды шараға аудан әкімі Талғат Байеділов арнайы қатысып, нәзік жанды аруларға ізгі тілегін білдірді. 

Меркелік көңіл күйді сезіндірер сахнада ең әуелі арулар туралы мазмұны терең бейнебаян көрсетілді. Салтанатты мерекенің басында аудан әкімі Талғат Байеділов құттықтау тілегін білдірді. Аналар мен арулардың ел болып ұйысып, жұрт болып жұмылу, Тәуелсіздігімізді тұрақты, ертеңімізді шуақты ету жолындағы, өлшеусіз еңбектерін сөзіне арқау етіп, ыстық ықыласын арнады. Сахна төрінде ауданымыздың дамуына зор үлесін қосып жүрген ханымдарды марапаттады. Бірінші болып Президентіміздің Жарлығымен «Алтын алқа», «Күміс алқа» иегері атанған аналар марапатталды. Сонымен қатар, өз ісінің үздігі болған нәзік жандыларға облыс әкімі Марат Сұлтанғазиевтің, аудан әкімінің Алғас хаты мен сый-сияпатын табысталды.

Мереке барысында аудандық ардагерлер ұйымының төрағасы Жұман Мықыбаев аналарымыз жөнінде ізгі ниетімен өрнектелген баяндамасын оқып, ақжарма тілегін ақтарды.

Мереке эстрада жұлдыздары мен ауданымыздағы мәдениет саласында табысты еңбек етіп жүрген өнерпаздардың концерттік бағдарламасымен жалғасын тапты.

Ринат НАРХАНОВ.