Жиынға облыстық жастар саясаты орталығының ақпарат және насихат тобының мүшелері, облыстық дін, туризм басқармасының, «Даму» кәсіпкерлікті қолдау қоры мен аудандық ішкі саясат бөлімінің өкілдері, аудан имамы C.Төреқұлов және жастар қатысты. Жиынды ресурстық орталық жетекшісі Айбек Ілебай жүргізді.

Облыстық Жастар саясаты орталығы директорының орынбасары Алия Байғанұсова, «Даму» кәсіпкерлікті қолдау қорының Алматы облысы бойынша аймақтық филиалының кеңесшісі Ыбырай Меңдібаев, Алматы облысы туризм басқармасының маманы Айдана Бақтыбекқызы, аудандық ішкі саясат бөлімінің бас маманы Қайсар Асқарұлы, ауданның бас имамы Сапархан Төреқұлов байыпты баяндамалар жасап, жастар қауымын баурап алды.

«Дінге бет бұрған жастар білімсіздік салдарынан адасып жатыр». Бұл Сапархан Төреқұловтың сөзі. Ойын әрмен қарай былайша өрбітті аудан имамы: «Бұрын көрмеген, бейтаныс жандар теріс үгіт пен түсініктерін дәл осындай жастар қауымына тез сіңдіріп, елітіп әкетуде. Дін Ислам алдымен білімге үндейтіндігін жастар қауымы жадынан шығарып алады. Алайда, Ислам діні «қыр» мен «жой» дейтін кері түсініктерді дәріптемейді. Ол сабырға, мейірімге, білімге, тазалыққа үндейді. Бұл түсініктерді бойына орнатқан адам нағыз мұсылмандар санатында» – дейді бас имам. Ал облыс өкілдері кәсіпкерлік және туризм турасында түсініктер берді.

Кез-келген кәсіп түрімен айналысуға жастар қауымында мүмкіндік мол екендігін жеткізді Ыбырай Меңдібаев. Бизнес жоспар құрып, кәсіп ашпақ ниеттегі жандарға қомақты қаржылай қолдау барын айтты.

Туризм турасында Айдана Бақытбекқызы әңгіме өрбітті: «Еңбекшіқазақ ауданындағы көрікті жерлер көңіл сергітіп, еркін серуен құруға ыңғайлы табиғи орта. Бұл кереметті де жастар қауымы байқамай жатыр. Жаяу туризм немесе велосипедпен сабақтан тыс бұл жерлерді аралап қайту көп қаражат пен уақыт сұрамайды. Бұл тек әрбір жастың ынта-жігеріне байланыс-ты. Сөйтіп, туризм саласын дамытуға үлкен үлес қосқан боласыз» – деді. Айбек Ілебай және Қайсар Асқарұлы діни экстремизм және терроризмнің алдын алу мақсатында аудан көлемінде өткізілген іс-шаралар турасында ақпарат берді. Бәйдібек би ауылдық округінде «Дін: жастар және қоғам» атты дөңгелек үстел, Түрген ауылында моргиналды жастармен «Қоғамдағы жастардың рөлі» және Қаракемер ауылдық округінде «Жастардың рухани өмірінде діннің алатын орны қандай?» тақырыптарында және аудандық ішкі саясат бөлімі мен құқық қорғау органдары бірлесе өткізген Жетісу заң колледжі қабырғасында «Шырмауыққа шырмалған» акциясы, «Шырмауық», «Радикализм – біздің жол емес» атты видеороликтер көрсетілгенін айтып өтті.

 Жиын барысында жастар көкейкесті сұрақтарын келген қонақтарға қойып, қанағаттанарлық жауаптар алды.

Ә.МАНАСБЕК.