Облыстық байқаудың аудандық кезеңінде аудандағы жүз арудың ішінен іріктелген он бойжеткен өздерінің ақыл-парасатын, өнері мен қазақ қызына тән ибалығы мен инабаттылығын сарапқа салды. Олар «Өз өнерін көрсету», «Үй тапсырмасы» және «Фобия» кезеңдері бойынша сынға түсті. Олардың өнеріне идея авторы Райхан Тұрсынбаева, «Астана» арнасының продюсері Маржан Сәдуақасова, «Достар» прдюсерлік орталығының директоры, актер Еркебұлан Молдашев, әнші Асан Санат пен Мұхтар Әскербек қазылық етті. Құттықтау сөзінде Бекет Ахметов қатысушы қыздарға сәттілік тілеп, шара ұйымдастырушыларына алғыс білдірді. Шара барысында көрермендер сұлулардың өнерін тамашалап қана қоймай, белгілі әншілер Асан Санат, Нұржан Керменбаев тағы да басқа эстрада жұлдыздарының әндерін қосыла шырқады.

Нәтижесінде, бартоғайлық Умида Айсрахунова жүлделі үшінші орынды иеленді. Есік қаласының аруы Хатуна Маметова екінші орынға жайғасып, ЕГЭК студенті Толғанай Нұрсапа І орынға табан тіреді. «Бәрінен де сен сұлу» байқауының гран-при иегері бәйтеректік Назым Жұмағали ханшайым тәжін киіп (суретте), облыстық байқауға жолдама алды. Шара соңында қатысушылар мен жеңімпаз аруларға қомақты қаржылай сыйлықтар табыс етілді.

Сардарбек НҰРАДИН.