Қадірлі қазағым өмірдің барлық жайын ескере білген ғой, шіркін. Содан да шығар «Өсетін елдің қарты қазына болар» деп дәл айтқаны. Ауданымыздағы қазыналарымызды жинап, «Ардагерлерді ардақтайық» бағдарламасы аясында жақында қалалық әкімдіктің мәжіліс залында аудандық «Батагөй қария» сайысы өтті. Ұйымдастырушы – С.Сәлімбаев бастаған аудандық ардагерлер кеңесі.
«Алпыс – дер шағы, жетпіс – мәр шағы, сексен – жер шағы» демекші, аталарымыз еңсеріп тұрған жастарына қарамастан иықтарына ою-өрнегі келіскен қазақы шапандарын жауып, ауылдарының намысын арқалай келді жарысқа. «Ауылыңда қария болса, жазып қойған хатпен тең» деген осы болар. Есік, Ақши, Жаңашар, Қаражота, Қаракемер, Қаратұрық, Көктөбе, Тескенсу, Қазақстан, Шелек округтерінің ақсақалдары сайыс ережелері бойынша бір-бір билет алып, сол жерде берілген тақырыптарға сәйкес бата түрлерін көрсетті. Батагөй қарияларды сын тезінен өткізіп, баға беруге аудандық «Еңбекшіқазақ» газетінің бас редакторы Хайролла Ахметжанов, «Нұр Отан» партиясы аудандық филиал төрағасының бірінші орынбасары Қуат Байғожаев, аудандық «Әйелдер кеңесі» қоғамдық қорының төрайымы Роза Исатаева атсалысты. Қазыналы қарттар қазақтың қара домбырасын қолдарына алып, ән шырқап, бір жадырасып қалды. Сонымен, сайыстың нәтижесі бойынша Тескенсу округінен келген Серікбай ата Ахметов пен Қаражота округінен ат арытып келген Әбдуәли ата Жұмаханов батагөйлікпен оза шауып, алдыңғы орындарды иеленді. Жас та болса ақшилік Барат Әлиакпар үздіктер қатарынан көрінді.Жеңімпаздар арнайы грамоталармен марапатталып, сый-сияпатқа қол жеткізді. Сонымен қатар, байқауға қатысушы барша қариялар «Нұр Отан» партиясының Алғыс хаттарын алып, мәз-мейрам болысты.
Алмагүл НҰҒМАН.
