Жаңа жылдық жағымды жайтқа Түрген селолық округінің әкімі Бота Елеусізова арнайы қатысты. Ізгі тілегін де білдірді:
– Шыны керек, Жаңаберген Мұхамедовтың төрағалығындағы бұл қор биылдың өзінде аудан аумағында ауқымды шаралардың ұйытқысы болды. Оны БАҚ беттерінен оқып, біліп отырсыздар. Бүгін осы игіліктің жалғасы Сіздерге де жетті. Округімізде бас болып қаншама отбасыларына да көмек қолын созды. Осындай жомарт жүрек жандарымыз көбейсін, – деді.
Қайырымдылықтың мән-жайын сұрағанымызда Жаңаберген Мұхамедұлы:
– Бұл менің ғана еңбегім деп айтуға келмейді. Бұнда осы түргендік тұрғындардың да көмегі зор. Мен тек ұйымдастырушымын. Кейбір кәсіпкерлеріміз тауар сатып алғанда кейбірінің жібі аз-кем сөгіліп қалады. Немесе шегесі алғашында дұрыс қағылмай жиһазды кішкене бүлдіріп алады. Оны лақтыруға да қимайды. Сондықтан аз-кем қайырымдылық болсын деп осында әкелді. Айталық, мына кілемдердің басым көпшілігінің шетіндегі жібі сөгілген. Ал оны ішке қайырып тіксе болғаны – біраз жыл іске жарайды, – деп ағынан жарылды.
Кейіннен Бота Серікқызы:
– Енді округімізде осы жұмысты жандардыру мақсатында қайырымдылық қабылдау пунктін ашуды жоспарлап отырмыз. Пункт округіміздегі мәдениет үйінде болады. Мұнда арнайы осы мәдениет үйінің маманын бекітеміз. Аптасына екі күн қабылдайды. Кез келген кәсіпкер, тіпті, тұрғындарымыз өз ниеттерімен заттарды әкелуіне болады. Бәрі де жазылып отырады. Кейін жиналған соң, аз қамтылған отбасыларына тегін таратамыз. Өз қалауларынша керегін алады, – деп жаңа жылғы жоспарын да жария етті.
Айтып өтейік, «Елім-ай» қоғамдық қоры қой жылында толағай қошеметке бөленді. Қор төрағасы Жаңаберген Мұхамедов Астанада өткен республикалық «Қайырымдылық керуені» меценаттар форумына қатысып келді. Кейіннен облыс әкімінің, Елбасының Алғыс хатына ие болды. Бұл турасында:
– Әрине, марапат алу – құрмет. Бұл – еңбегіңнің еленгені әрі алдағы жұмыс істеуіңе шабыт береді. Осы тұрғыда бізге жан-жақты қолдау көрсетіп отырған аудан әкіміне алғысымды білдіремін, – дейді Жаңаберген Мұхамедов.
Қайнар ЖҰМАҒОЖА.