Өскелең ұрпақты халқының батырларымен таныстыру арқылы, олардың бойында патриоттық сезімді тәрбиелеуге бағытталған шара «Ұлы таулар аласармайды, ұлы есімдер ұмытылмайды» тақырыбын арқау еткен. Батыр атамыздың Ұлы Отан соғысындағы ерліктері мен бейбіт замандағы ұстаздық жолы баяндалып, еске алу кешінің қонақтары болып отырған Р.Тоқатаевтың шәкірттері мен қызметтес болған әріптестері де өз естеліктерінен үзінділер келтірді. Сонымен қатар, аудандық ақсақалдар кеңесінің төрағасы Т.Ұзақов пен қалалық ақсақалдар кеңесінің төрағасы Д.Шәріпбаев сөз алып, өтіп жатқан шараның маңыздылығына тоқталып өтті.
Көктөбе орта мектебінің және Р.Тоқатаев атындағы орта мектеп оқушылары дайындаған шағын концерттік бағдарлама кеш көркін кіргізіп, шырайын асырды. Батыр атаға арналған көрме таныстырылып, интерактивті тақта арқылы слайд көрсетілді.
Алмагүл НҰҒМАН.
