Атадан қалған ұлттық өнерді тамашалауға облыс әкімінің орынбасары Бақтияр Өнербаев, аудан әкімінің орынбасары Бекет Ахметов, «Қыран» федерациясының атқарушы директоры Бағдат Мүптекеқызы, ұлттық спорт түрлері қауымдастығының вице-президенті Ерлен Оспанов, бөлім басшылары мен округ әкімдері қатысты. Республиканың түпкір-түпкірінен қонақтар ағылып келді. Мұнда, тіпті, шетелдіктердің де қарасы қалың.

Сайыстың шымылдығын ашқан Бақтияр Өнербаев өзінің құттықтау сөзінде:

– Саятшылық өнер – бізге ата-бабадан қалған баға жетпес байлығымыз. Осы қазынаны келер ұрпаққа қаз-қалпында жеткізу – асыл парызымыз.

Жер жәннаты болған Жетісуда бүгінде ұлттық өнер даму үстінде. 1987 жылдан бастап дәстүрлі түрде өткізіліп жатқан «Сонар» құсбегілер байқауы осы жылы да шымылдығын түрді. Көріңіздер. Демалыңыздар. Ұлттық өнерді насихаттауға өз үлестеріңізді қосыңыздар – деп қатысушыларға сәттілік тіледі. Бағдат Мүптекеқызы мен Ерлен Оспанов та көпшілікті бабадан қалған мәдени-спорттық мұраны қастерлеуге шақырды.

Байрақты бәсекеде Ақмола, Атырау, Қызылорда, Қарағанды, Жамбыл, Алматы, Шығыс пен Оңтүстік Қазақстан облыстары және Астана қаласынан 60-қа жуық құсбегілер командасы өзара бәске түсті. Әділ-қазылар алқасы құстардың аңға түсу шеберлігіне ғана мән бермеді. Сондай-ақ, құстың сыны, құсбегінің киім үлгісі, екеуінің ара-қатынасын да бақылап, бағалады.

Жарыстың алғашқы кезеңінде бүркіттерді қоянға салды. «Сүрінбейтін тұяқ жоқ». Жерсінсе керек, қырандардың көбісі қоянды ала алмады. Байқаудың келесі кезеңінде құсбегілер мен құстар өздерінің қырағылықтарын көрсетті. Десе де, қу түлкі бірнеше бүркіттен айласын асырып, тырнағына ілінбей кетті. Тек, үш бүркіт қана ә дегеннен түлкіні астына басып, қожайынының қанжығасын майлады.

Екі күнге созылған байқаудың қорытындысы бойынша І орын Атырау облысынан келген 15 жасар Сармат Әбдікәрімұлына бұйырды. Бұл Ұшқыр атты бүркітпен атыраулық баланың екінші жеңісі. Ал астаналық Серікбек Күнтуған ІІ орынды қанағат тұтты. Қостанай облысының құсбегісі Бергенбай  Тастанбек ІІІ орынға жайғасты.

Қаршыға салу бойынша Жамбыл облысынан Берікболсын Жалғасұлы өзегелерден оқ бойы озық шығып, І орынды иеленді. Дәл осы облыстың құсбегісі Бақдәулет Бабажан ІІ орынға табан тіреді, үздік үштікті ақтөбелік Ақберен Құрманғалиев қорытындылады. Жеңімпаздар бағалы сыйлықтармен марапатталды.

Сардарбек НҰРАДИН.