3,5 млн теңгеге мектеп оқушыларының қара жолды қауіпсіз кесіп өтуіне арналған бағдаршам орнатылған болатын. Сол бағдаршамды ақпан айының 6-шы жұлдызынан 7-іне қараған түні сындырып кеткен. Бағдаршамға бағынғысы келмеген әлдекімнің әрекеті ме, жоқ шайтан суға мас болған адамның ісі ме?... Анығын тергеу қызметі анықтауда. Жолау-шы көлігі және автомобиль жолдары бөлімінің басшысы Бейбіт Ысқақовтың айтуынша бұл әрекетімен белгісіз қастық ойлаушы 500 мың теңгеге залал келтірген мемлекетке. Өздігінен басқарылып тұрған, автоматтандырылған бағдаршам мектеп оқушыларының қауіпсіздігін күндіз-түні күзетіп тұрған еді. Кейбір жүгенсіз жүрген шу асау көлік жүргізушілері қызыл жанғанда қызара бөртіп, тежегішті тездетіп басуға асығатын. Жоғарыда қастық ойлаушы деген сөзді де дәл қолданып отырғанымды дәлелдеп өтейін. Белгісіз қылмыскер мектеп оқушыларына қастық жасап отыр.
Қауіпті жолды кесіп өткен мектеп оқушылары Д.А.Қонаев атындағы орта мектепке жол тарта- ды. Байпаң басқан балапан тәріздес бүлдіршіндер үшін бағдаршамның тұсы ағысы қатты өзеннің өткеліндей-тұғын. Айтып өтейік, Д.А.Қонаев атындағы орта мектепте бүгінгі таңда мектепал- ды даярлық сыныптарын қоспағанда 900-ден аса оқушы білім алуда. Мектеп директоры Шымберген Пірімбаевтың да пікірін білдік. «Бұл бағдаршамды ауыл тұрғындары асыға күтті. Өйткені, жол – қашанда қауіп пен қатерге толы. Көпшілік көлік мінетін заман. Бағдаршам орнатылмай тұрып біз балалардың қауіпсіздігін қадағалау мақсатында таңертең, түсте және кешкі уақыттарда кезекшілік қойып жүрдік. Бағдаршам орнатылғалы біз де, ата-аналар да уайымнан арылғандай едік. Бағдаршамды бұзған адам саналы түрде қастандық жасап отыр» – деп, өз ойын ортаға салды. Бейбіт Ысқақовтың айтуынша ауылдық округтерді айтпағанда аудан орталығы Есік қаласында орнатылған бағдаршамдарды тапанша және мылтықпен атқан бұзақылар. Бұл әрекеттерін олар түнгі уақыттарда жүзеге асыраған. Салдары белгілі...
Техника жылдамдығын тежеп тұрған бағдаршамдар – заманның талабы. Бұл заман қара дүрсін күш пен адам өмірінің алма-кезек арпалысқан кезі. Осы дүлей күш пен адамның нәзік ғұмырын реттеуші бағдаршамдар және тағы басқа құрылғыларсыз тас көшеде тап- талып жататынымыз айқын. Өзіңіз көз алдыңызға елестетіп көріңізші. Елімізде бірде-бір бағдаршам жоқ, жаяу жүргіншілерге арналған жолақтар жоқ. Мектеп бүлдіршіні көліктер легі қашан толас табар екен деп жолдың жиегінде тұр. Кенет, сабаққа асыққан ол жүгіре жөнелді. Бірақ, техника тежегіші тоқтап үлгергенше... Алла сақтасын. Қолыңа тас, тапанша немесе мылтық алмас бұрын ойланғайсың... Сөз соңында, басбұзар бұзықтарды тауып жазалап қана қоймай, жалпақ елге жариялау керек-ақ. Сабақ болсын, арам ойлы пасықтарға.
Әділет САРЫБАЙ.
