Аудандағы «Алтын белгі» иегерлері, үздіктер мен халықаралық ғылыми жоба жеңімпаздарының басын біріктірген салтанатты шараға аудандық мәслихат хатшысы Бекет Ахметов, аудан әкімінің бірінші орынбасары Нұржан Құдайбергенов және бірқатар бөлім басшылары мен мектеп директорлары, мақтаныштарымыздың ата-аналары қатысты. Көзінде нұр, көңілінде қуаныш тұнған жас түлектер еш алаңсыз. Себебі, өмірінің бір белесі сынақты сәтті тапсырғандар. Сәтті дегеннен шығады, биылғы ҰБТ жылдағыдан өзгеше. 16 «Алтын белгі», 30 үздік аттестат және 19 халықаралық ғылыми жоба жеңімпаздары шықты ауданымыздан. Осынау жоғарғы көрсеткіш өз кезегінде ауданның білім саласының бағындырған биігін байқатып тұр емес пе?
Түлектер қадамына Нұржан Кеңесұлы сәттілік тіледі:
– Ел ертеңі, ақылына білімі сай тәуелсіз елдің жалынды жастары – сіздерсіздер! Сондықтан жауапкершілікті терең сезініп, әрқашан сенім биігінен шыға білулеріңізге тілектеспін!
Құрметті түлектер, алдағы уақытта тек жақсы жетістіктеріңізбен, жоғарғы көрсеткіштеріңізбен қуанта беріңіздер. Мен Сіздерге аудан тұрғындары атынан жоғары білімді, жақсы азамат, білікті маман болып, болашақта ауданымыздың, еліміздің өркендеуіне лайықты үлес қосады деген сенім білдіремін. Үлкен өмір жолына бастар қадамдарыңыз сәтті болсын! Ақ жол саған, жас түлек!
Кейіннен ата-аналарға аудан әкімінің Алғыс хатын тапсырды Н.Құдайбергенов. Түлектер үшін тарихи сәтте мақтаныштарымыз аудан атқамінерлерімен естелік суретке түсті, сапалы білім алуына жағдай жасаған аудан әкіміне алғыстарын жеткізді.
Қайнар ЖҰМАҒОЖА.