Отбасын нығайту – қоғамдағы тұрақтылықтың, елдегі тұтастық пен келісімнің кепілі. Осы орайда Елбасы Н.Ә.Назарбаев: «...Біздің қоғамда отбасы ұрпақтар байланыстырушысы, мәдениет пен дәстүрдің сақтаушысы болды және болып қала береді. Отбасы – береке-бірліктің қайнар көзі. Отбасының бірлігі – Отанның бірлігі, ағайынның татулығы – Атамекеннің тұтастығы. Біз жас ұрпақтың білімді, дені сау болуы, әрбір некенің мызғымас берік болуы, қарттардың зейнетті өмір кешуі үшін барлық жағдайды жасап келеміз. Бұл демографиялық ахуалға оң әсерін тигізуде» – деген болатын. Осындай қазақы құндылықтардың қаймағын бұзбай келер ұрпаққа насихаттап жүрген отбасылар бас қосқан жиынның басында сөз алған аудандық ішкі саясат бөлімінің басшысы Момунжан Исламов отбасы мүшелерін марапаттап қана қоймай, ұрпақ тәрбиесіне атсалысқан ақсақалдар мен ақ жаулықты аналарға аудан әкімі Бинәлі Әбдіқапасұлының атынан алғысын жеткізді:
– Сандық технология дамып, жастарымыздың санасын ғаламтор жаулаған заманда келешекте еліміздің тұтқасын ұстар азаматтарға жөн сілтер адамдар өздеріңіз ғана. Болашаққа бағдар беріп, дұрыс жол нұсқайтын да өздеріңіз. Байқаудың мақсаты да сол. Жастардың бойында адамгершілік құндылықтарды қайта жаңғыртуға, отбасы мәртебесін көтеруге бағытталған. Сондай-ақ, отбасы институты, руханилықты, бала тәрбиесіндегі ата-ананың жауапкершілігін, отбасы құндылықтарын насихаттау, ата-аналарға қамқорлық жасауға үгіттеу, қазақстандық отбасының жағымды имиджін насихаттауға қосқан үлестеріңіз үшін ризашылығымды білдіремін – дей келе отағаларына алғыс хаттар мен бағалы сыйлықтарын табыстады. Соның ішінде Сарыбұлақ ауылынан келген Жұмақановтар отбасын облыс әкімі Амандық Баталовтың Алғыс хатымен марапаттады.
– «Жасарымызды жасап, асарымызды асадық» – деп отырмай, бәріміз Тәуелсіз Қазақстанның келешегін жарқын ету жолында еңбек етуіміз керек. Ал біздің қолымыздан келері – ел келешегі – жастарды дұрыс жолға салып, оларға қамқор болу. Осы жолда тер төгіп жүрген отбасылардың бар екендігі бізді қуантады – дейді «Мерейлі отбасы» ұлттық байқауына қатысушылар. Бірауыздан осылай деген отбасының ақсақалдары сайыстың ұйымдастырушыларына ризашылықтарын жеткізіп, елдің тыныштығы жолында аянбай тер төгетіндіктерін жеткізді.
Сардарбек НҰРАДИН.