«Дені саудың – жаны сау» – деген сөз бекер айтылмаса керек-ті. Спортты жанына серік еткендер ауру-сырқаудың не екенін білмейді әрі саламатты өмір салтын насихаттайды. Шыны керек, бүгінгі жастарымыз зиянды әдеттерден аулақтап, спортпен шұғылдануда. Түрлі жарыстар ұйымдастырып, бүлдіршіндерге үлгі болуда. Жақында осындай мақсатта Есік қаласындағы дене шынықтыру-сауықтыру кешенінде баскетболдан Алматы облысының чемпионаты өтті. Екі күнге созылған жарысқа облыс аумағындағы 10 ауданнан 10 команда қатысты.
Тәуелсіздіктің 25 жылдығына орай ұйымдастырылған чемпионаттың ашылу салтанатында аудандық дене шынықтыру және спорт бөлімінің басшысы Ерболат Сарабеков жастардың спортқа көптеп тартылуына қуанатындығын жеткізді:
– Бүгін тәуелсіздік ақ таңының атқанына да ширек ғасырдың жүзі болды. Осындай жас мемлекеттің ертеңін жарқын етушілер – дені сау жастар ғана. Сіздер спортпен айналыссаңыздар біз соған қолайлы жағдай жасауға тырысамыз. Оның бір көрінісі – өздеріңіз көріп тұрған хан сарайы-на бергісіз спорт кешені. Осы ғимараттың иесі өздеріңіз – дей келе жарысқа қатысушыларға сәттілік тіледі. Төрешілер ойыншыларды ойын ережесімен таныстырып, жұп-жұпқа бөлді. Екі күн бойы сақинаға доп лақтырған спортшылар жоғарғы дәрежедегі ойын үлгісін көрсетті. Ауданымыздың құрамасы Ұйғыр ауданынан басым түсіп, өз жанкүйерлерін қуантып тастады. Іле ауданының баскетболшылары келмегендіктен, тағы бір жеңісті қанжығаладық. Десе де, ептіліктерінің арқасында Қапшағай құрамасы мен талдықорғандықтар аудан баскетболшыларынан басым түсті.
Сайыс нәтижесі бойынша, Талғар ауданының баскетболшылары бірінші орынды иеленді. Қарасайлықтар екінші орынға жайғасса, үздік үштікті қапшағайлықтар қорытындылады. Талдықорған қаласы төртінші, еңбекшіқазақтықтар бесінші орынды еншіледі. Жеңімпаздар кубокпен, медальдармен марапатталып, қатысушыларға алғыс хаттар табысталды.
Сардарбек НҰРАДИН.
