Жастардың мерекесіне «Нұр Отан» партиясы аудандық филиал төрағасының бірінші орынбасары Қуат Байғожаев, Есік қаласының әкімі Бауыржан Бименов қатысып, жылы лебіздерін жеткізді.
– Жастар – біздің болашағымыз. Ал осы жастардың өзара тату, ынтымақта өмір сүріп, саламатты өмір салтын ұстануы – жарқын келешектің кепілі. Бүгінгі жайдарман ауданымыздағы барлық жастардың көңілін жаулап алды десек артық айтқандық емес. Алғашқы жылдары саусақпен санарлық команда өнер көрсетсе, осы маусымашардың шымылдығын 54 командамен аштық. Демек, ел келешегі болған сіздер, жастар дұрыс жолмен, өздеріңізге, қоғамға тигізер пайдасы мол жолмен келе жатырсыздар – деп аудан жастарына деген ыстық ықыласын білдірді. Ойынға қатысушы «Қазақ жастары», «Нартәуекел», «Тәуекелді жігіттер», «Қобалжыма», «Алатау», «ЕМК» командалары үш сайыс бойынша сынға түсіп, астарлы әзілдерімен көрермен жүрегіне жол тапты. Кіл мықтыда, кім мықтыны аудандық мәслихат депутаты, жастар ресурстық орталығының жетекшісі Айбек Ілебеав, Есік қаласы әкімінің орынбасары Қуат Ақшабаев, Алматы қаласының жайдарман өкілдігінің директоры Ердос Оралбек, «ЖасНар» жайдарман командасының ойыншысы Жомарт Зиябек, «NOMAD» жайдарман құрамасының ойыншысы Ержан Қуанышбеков анықтап, чемпиондыққа барын салған құрамалардың өнеріне әділ бағасын берді. Биылғы жайдармандағы ең жас команда Қ.Сәтпаев атындағы орта мектеп оқушыларынан құралған «Нартәуекел» құрамасы ойында көрермендердің де, қазылар алқасының да көңілінен шықты. Ұтымды әзілдерімен ғана емес, жарасымды биімен талайды тамсандырып бірнеше жыл финалда өнер көрсеткен «Қазақ жастары» бұл жолы да өз биігінен түспеді.
Жарыс нәтижесінде, қазылар алқасының шешімімен, ең жас ойыншы Айдарбек Шонкиев «Үздік ойыншы» атанды. Манас Жарылқасынов «Үздік капитан» номинациясын еншіледі.
ІІІ орынға Жетісу Заң колледжінің «Тәуекелді жігіттер» командасы жайғасып, ІІ орын «Нартәуекел» жайдарман тобына бұйырды. І орынды бөлектік «Қазақ жастары» командасы (суретте) иеленіп, чемпион атанды. Жеңімпаздар мен үздік ойыншыларға ақшалай және бағалы сыйлықтар табысталды. Сондай-ақ, барлық қатысушы командалар аудан әкімінің Алғыс хатымен марапатталды.
Сардарбек НҰРАДИН.