Бөлектіктер Ұлыстың Ұлы күнін Әймен ауылында жоғары деңгейде атап өтті. Думанды той Әймен орта мектебінен бастау алды. Сахна төрінде талантты оқушылар ән салып, би билеп, театрланған қойылымдар көрсетіп, бар өнерлерін ортаға салып жұршылықтың қошеметіне бөленді. Әсіресе, қыс айындағы жаңа жыл мен наурыз айындағы жаңа жыл болып айтысқан Жасұлан Дүйсембі мен Асхат Мейрамханның өнерлері көрермендерді тәнті етті.
Мереке барысында сөз алған округ әкімі Асыл Изиев Наурыз еліміз үшін ұлттық құндылығымызды әспеттейтін, бабаларымыздан бүгінге дейін үзілмей келе жатқан ең маңызды әрі қасиетті мейрам екенін айтты. Сондай-ақ, ауыл тұрғындарын жаңа жылдарымен құттықтап, наурыздан наурызға жақсылықтармен, қуаныштармен аман-есен жетулерін тіледі.
Мектептің айналасында ұлттық нақыштағы көрмелер қойылды, ауыл ағаларының ұйымдастыруымен, келген халықтың бәріне мол дастархан жайылып наурыз көже таратылды. Сондай-ақ, ауылдың төменгі жағындағы жазық далада көкпар, күрес ойындары өтті. Білектері мен жүректеріне сенген, аттың құлағында ойнайтын жігіттерді көріп жиылған жұрт бір марқайып қалды. Күреске қатысқан балуандар арқылы да қазақтың мейрамы керемет көрініс тапты.
Мереке соңында Ақтай Жақия, Шынарбек Сатыбалды, Бозтай Жақия, Тілейхан Солтанхан сынды ел ағалары жеңімпаздарға сыйлықтар табыс етті. Сонымен қатар, бұндай есте қалар күнді ұйымдастырған округ әкімдігіне, мектеп ұжымына, ауыл тұрғындары мен ауыл жастарына алғыс білдірді ақсақалдар.
Ринат НАРХАНОВ.
