«Біз тәуелсіздікпен бірге тілімізді түлеттік, дінімізді өркендеттік, тамырымызды жалғап, салт-дәстүрімізді жаңғырттық. Ұлттық жаңғыртуды жүзеге асырып, жаңа құндылықтар қалыптастырдық. Ғасырлар қойнауынан асылдарымызды аршып алдық». Елбасының бұл сөзі тәуелсіздіктің арқасында талай биіктерге қол жеткізгендігімізді айғақтайды. Міне, жоғымызды түгендеткен егемендікке биыл ширек ғасыр толып отыр. Осыған орай және Қазақстандағы ұлт-азаттық көтерілісінің 100 жылдығы аясында «Егеменді елдігім – Тәуелсіздік теңдігім» тақырыбында Алматы облысы аудандары мен қалаларының мәдениет күндері ұйымдастырылды. Ауқымды шара аудан орталығында жалғасын тауып, сәрсенбінің сәтінде «Тәуелсіз ел тарландары болу керек талантты» атты ауданымыздың мәдениет күні өтті.
Облыстан келген комиссия мүшелері мен аудан басшысы Бинәлі Ысқақ аудандағы этно-мәдени бірлестіктердің мәдениет үйінің алаңындағы көрмесін аралап, салт дәстүрлерімен танысып, ұлттық тағамдарынан дәм татты. Атадан қалған кәсіптің ізін жалғаған құсбегілердің, ұлттық өнерді насихаттаған қолөнершілердің көрмесінен ерекше әсер алып, алғыстарын жеткізді. Мерекелік шара басында Бинәлі Әбдіқапасұлы көпшілікті мерекемен құттықтап, ыстық лебізін білдірді. Кейіннен, жиылған жұртшылық пен құрметті қонақтар аудан өнерпаздарының өнерін тамашалап, дәстүрлі әнмен құлақ құрышын қандырды. Облыс орталығының өкілдері 54 этнос тату-тәтті күн кешкен ауданымызға қызыға қарап, оң бағасын берді. Мәдениеттің ошағына айналған еңбекшіқазақтықтардың өнеріне тәнті болып, ерекше әсерге бөленді.
Аудан орталығында өткен мәдениет күндері жайлы толық материалды газетіміздің келесі санынан оқи аласыздар.
Сардарбек НҰРАДИН.
