Құттықтау сөзімен ортаға шыққан мектеп директоры Бақытжан Рахымжан келіндерге сайыста сәттілік пен табандылық тіледі. Бес бөлімнен құралған сайыстың алғашқы «Таныстыру» сатысында келіндердің шабысы анықталғандай еді. Әрі қарай өнерлерін ортаға салып, пародияға пәрмендері жетпесе де тырысып баққан ауыл келіндері «Ұлттық тағам» бөлімінде бірінен бірі асып түсті. Тек ас үйде ғана шебер емес, сондай-ақ он саусағынан өнер таматынын келіндеріміз «Қолөнер» бөлімінде анық байқатты. Алғашқы кезеңнен-ақ көрермендер мен қазылардың көңілінен шыққан аяулы келін, асыл ана болып жүрген Шынар Делтаева бас жүлдені қанжығасына байлап, сый-құрметке бөленді. Бірінші орынды инабаттылығы бойына жарасқан жас келін Шакура Жұмағали иеленсе, екінші орынға «пародияның патшайымы» атанған Гузель Смайлова жайғасты. Үшінші орынды Шолпан Нахипова мен Арайлым Өмірғалиева өзара бөлісті. Жеңімпаздар арнайы сыйлықтармен марапатталып, барлық қатысушылар түрлі номинациялар бойынша іріктелді.
Алмагүл НҰҒМАН.