Алғаш сөз алған Әділбай Айнабекұлы: – Жастық жалынымды еліміздің, оның ішінде ауданымыздың өркендеуіне арнадым. 50 жылға жуық тынбай еңбек еттім. Соның 25 жылы кеңестің құзырында кетті. Кейінгі 25 жылы осы Тәуелсіз Қазақстанымның өркендеуіне арналды. Бұл үшін мақтанамын да, қуанамын да, – деп бастады әңгімесін. – Кеңестің саясаты өте жұқа еді. Бас-тысы, елімізді тілінен, дінінен айыру, яғни, барынан айыру болды. Оған дәлел, ауданымыздың өзінде бір мектеп қазақ тілінде болмады. Ондағы қуат сондай, партия айтты, бітті. Прокурор, басқа да құзырлы органдардың сөзі жүрмей-тұғын. Содан мен аудандық білім бөлімін басқардым. Алғаш Тәуелсіздік алар тұста бірнеше мектептердің атауларын қазақшаладық. Сол кезде мектеп оқушылары қызыл галстук тағатын еді. Әйтіп-бүйтіп, көкке ауыстырдық. Көсемдердің ескерткіштерін алдырдық. Әкімдікте жиын өткенде толық орыс тілде болатын. Себебі, 25 пайыз ғана қазақтар тұратын бұл ауданымызда. Қазір өздеріңіз байқағандай, бірде-бір жиынымыз толық орыс тілінде өтпейді. Мұның өзі – Тәуелсіздіктің жемісі. Осымен бірге ұлтаралық татулықты қатар алып жүру де – саясат. Осы міндетті де барынша адал орындадық, – деді. 

Ал Хайролла Қасымұлы: «Әр үйдің қожайыны болмай, ол әулеттен береке кетеді. Сол секілді аумалы-төкпелі тұста ел тізгінін ұстаған Елбасымыз аттан түспеді. Күні-түні болашағымыз үшін еңбек етті. «Тәуелсіздікті алу қаншалықты ауыр болса, оны ұстап тұруға да соншалықты қажыр-қайрат керек» деген сөзі де осының дәлелі» деп, ойын қорытты.  

Конференцияны түйіндеген Жаңабер-ген Мұхамедұлы: «Тірлік басқа болса да тілек бір, саусақ бөлек болса да білек бір» деген Бәйдібек би бабамыз. Әрісін зерделесек, Күлтегіннің «Тату елге – тыныштық пен тоқшылық нәсіп» дегені еске түседі. Бейбіт күнге оралсақ, Көшбасшымыз Нұрсұлтан Назарбаев «Татулық арқылы – тұтастыққа қол жеткіздік» деді. Осы орайда көреген Көшбасшымыздың:

«Отан-Ана,

От бердің жүрегіме,

Риза боп қараймын гүл өңіңе.

Бабаларым сомдаған бағзы бейнең,

Тәуелсіз боп түрленді,

Түледі де.

Менде қандай арман бар, Асыл Ана,

Жарай алсам халқымның тірегіне!» – деген өрелі өлең жолдары әр қазақстандық азаматтың көкірегінде сайрап тұруы тиіс. Себебі, патриоттық тәрбие деген осы. Ал Еңбекшіқазақ ауданы – құт қонған, бақ дарыған, ынтымағы ұйыған, береке орнаған киелі мекен, қасиетті аймақ. Сондықтан қай қырынан қарасақ та салты сара, дәстүрі дара тарихи өңірдің бүгінгі тұрғындары Елбасы салған сара жолға түсіп, «Мәңгілік елге» айналу тұрғысында тындырымды тірліктер жасап келеді. Жасай береді. Себебі, «Біздің күш-қуатымыз – бірлікте», – деді.

Жиын соңында қатысушылар тарапынан бірқатар сұрақтар қойылып, пікір алмасты.

Қайнар ЖҰМАҒОЖА.