Жақында ғана қалың жұртшылыққа есігін айқара ашқан Есік қаласындағы Спорт кешенінде мемлекеттік қызметкерлер футболдан өзара сынға түсті. Өз саласында қызметтерін мінсіз атқарып жүрген мамандардың ойынына футбол жанашырлары аудан прокуроры Төлеген Иманбаев, аудан әкімінің орынбасары Бекет Ахметов, аудандық «Еңбекшіқазақ» газетінің бас редакторы, облыстық мәслихат депутаты Хайролла Ахметжанов, аудандық ішкі саясат бөлімінің басшысы Момунжан Исламов пен дене шынықтыру және спорт бөлімінің басшысы Ерболат Сарабеков жанкүйерлік етті. Байрақты бәсекенің ашылу салтанатында Бекет Ахметов:

– Құрметті спортшылар, Елбасының арқасында осындай сәні мен салтанаты келіскен зәулім спорт кешенінде бас қосып отырмыз. Біз осы күнді ұзақ күттік. Және дегенімізге жеттік. Осының бәрі Сіз бен біздің атқарған еңбектің арқасы.

Сіздердің осындай спорттық шараларға белсене қатысқандарыңыз жастарға үлгі болмақ – дей келе қатысушыларға сәттілік тіледі. Ойынға өз мекемелерінің намысын қорғаған «Аудан әкімдігі», «Прокуратура», Емхана», «Ішкі істер басқармасы», «Шелек ішкі істер бөлімі», «Ойын федерациясы», «Балалар және жасөспірімдер спорт мектебі» командалары қатысып, өзара мықтыны анықтады.Тыңғылықты дайындықпен келген спортшылар өз саласында ғана емес футболда да алдырмас қамал екендіктерін көрсете білді. «Білекті бірді, білімді мыңды жығады» – деген дана қазақ. Білімі мен күші қатар ұштасып, мыңды жыққан мемлекеттік қызметкерлер жанкүйерлеріне жоғарғы деңгейдегі ойын үлгісін көрсете білді.

Нәтижесінде, өзгелерден оқ бойы озық шыққан білім бөлімінің құрамасы І орынды иеленіп, мерекелік кубокты еншіледі. Ал, «Прокуратура» командасы ІІ орынға жайғасып, үздік үштікке шелектік полиция бөлімінің қызметкерлері кірді. Жеңімпаздар медальдармен және алғыс хаттармен марапатталды.

Сардарбек НҰРАДИН.