Алдымен жиылған көпшіліктің назарына тұтынушылар құқығын қорғау басқармасының маманы Мардан Мейманов аудан тұрғындары арасында медицина қызметінің сапасын анықтау мақсатында жүргізген сауалнаманың қорытындысын ұсынды. Сонымен қатар, басқарма құрамынан ашылған тұтынушылардың құқығын қорғау бөлімінің басшысы Нұрлан Олжабаев бөлімнің қызметімен таныс-тырып, тұтынушылардың құқығы аяқ асты болмас үшін барын салатындықтарын жеткізді.
Санитарлық-гигиеналық қадағалау бөлімінің басшысы Ұлмекен Қанағатова аудандағы 110 медициналық мекеменің 76-сы тексерілгенін, оның ішінде 48 мекеме санитарлық талапқа сай келмейтіндігін айтты. Сәйкесінше, 46 медициналық мекемеге айыппұл салынған. Кемшіліктердің басым көпшілігі құжаттар мен ас мәзірі және залалсыздандыру кезінде орын алған. Жиын барысында сұрақтар мен шағымдардың негізгі бөлігі аудандық емхана бас дәрігерінің орынбасары Дидар Айтжановқа бағытталды. «Қамқор» мүгедектер қоғамдық қорының төрайымы Шолпан Бөкеева:
– Аудан аумағындағы емханаларда мүгедектерге арналған дәретхана мен пандустар жоқтың қасы. Сондай-ақ, аудандық емхананың жедел сатысы (лифт) көбіне жұмыс істемейді. Ал жасы келген қарттар мен мүмкіндігі шектеулі жандарға баспалдақпен көтеріліп-түсу оңайға соқпайды. Бұл мәселе қашан шешімін табады? – деп Дидар Айтжановқа сұрақты төтесінен қойды. Емхана басшысы орынбасарының сөзіне сүйенсек, жедел саты мәселесі қолға алынады, ал пандус-тар барлық 83 медициналық мекемелерде болмаса да, біртіндеп оң шешімін табуда. Оған қоса ғимараттардың басым бөлігі ескі болғандықтан, оларда мүгедектердің жүріп-тұруына қолайлы жағдай жасау қарастырылмаған. Айта кетейік, өткен жылдың 11 айында емханаға түскен 11 шағым талқыланып, оң шешімін тапқан. Ал аудандық сотқа былтыр сапасыз медициналық қызмет көрсетті деген шағым түспеген. Бұл туралы судья Ерлан Баймолдинов айтты.
«Жергілікті қауымдастықтар қорының» атқарушы директоры Бақытгүл Елшібаева.
– Ауданымызда еңбек мигранттары бар. Әсіресе, көрші қырғыз елінен келгендер. Ал олардың балалары немесе өздері ауырып қалса емханалар қабылдамайды. Бұл заңға қайшы емес пе? Өйткені, еуразиялық одаққа мүше елдердің азаматтары одаққа кіретін мемлекеттерде тең құқылы. Бізге осы мәселе бойынша қырғыз азаматтары хабарласып жатады. Осы олқылықтардың орны толтырылса, – деп өтінішін білдірді. Дидар Айтжанов та бұл тақырып талқыланатындығын жеткізді. Жиын соңында көпшілік осындай дөңгелек үстелдерді жиі өткізіп, емдеу ісінде болып жатқан келеңсіздіктердің алдын алу керектігін айтты.
Құрметті аудан тұрғындары, Сіз аудандық емханадағы келеңсіздіктер мен заңға қайшы іс-әрекеттерге куә болсаңыз емхананың 7-32-56 сенім телефонына хабарласып шағым түсіре аласыз. Ал аудандық перзентхананың сенім телефоны 7-12-97. Заң бұзушылыққа бірге тосқауыл болайық, құрметті оқырман.
Сардарбек НҰРАДИН.