Жылда Жеңіс күнін зор құрметпен қарсы алатын Достық ауылының соғыс ардагерлерінен көзі тірі бірде-бірі қалмапты. Жаңа типті ғимаратқа көшкен Қаратұрық орта мектеп ауласына Ұлы Жеңістің 70 жылдығы құрметіне тұрғындар жұмылып, соғыста қыршын кеткені, аман оралғаны бар, барлық Отан қорғаушыларға арнап ескерткіш орнатқан болатын. Биыл да мектеп ұжымы, ауыл ағалары бастап, қалғандары қоштап, өз қаржыларына Отан үшін отқа түскен 54 ардагерге «Ерлікке тағзым» ескерткіші қасындағы алаңға ақ қайың көшетін отырғызып, «Ардагерлер аллея-сын» салтанатты түрде ашты. Мектеп директоры демеуші болып, Даңқ бағының алдына раушан гүлдерін құлпыртып, қуаныштың көзайымына айналдырыпты. Соғысқа қатысқандар отбасы батыр ата-бабаларының суретін үлкейтіп жасатып, тақтайшаға іліп, «рухы өлмейтін ерлер» ретінде құрметтеп, Жеңіс шеруінде аттарын асқақтатпақшы. Құптарлық іс.
– Кейінгі жастар ерлікті ұран етіп, соғыс ардагерлерінің өмірінен үлгі алсын деген мақсатта осындай игі шараларды қолға алдық. 50-60 жастан асқан біз сияқты ересектер ескеріп, Отан үшін от кешкен, келешек үшін қан төккен асқар тау – азаматтарымызды әспеттемесек, қазіргі өскіндер қайдан білсін. Жастарды осындай өз ата-бабаларының өнегелі өмірін үлгі ету арқылы отансүйгіштік, патриоттық сезімге тәрбиелеуіміз керек. Алдағы уақытта әр ақ қайың түбіне мәрмәр тастан есімдері жазылған тақтайша, суреттері ілінеді. Ал, аллеяға /саяжолға/ отырызылған ағаштарды жас ұрпақтар күтіп-баптап өсіретін болады және мектеп түлектері естелік суретке түсіп, ұрпақтарына үлгі етеді, – дейді ауыл ағасы Әшім Садиров.
Иә, ерлік ешқашанда ұмытылмайды. Келешек үшін қан төгіп, Отан қорғап, от кешкен сарбаздардың бәрі – батырлар. Ерлер есімі елімен бірге мәңгі жасайды.
Анарбек БЕРДІБАЕВ.