Айналаны алтын түске ораған қоңыр күз де өтіп, алдымызда қаһарлы қыс мезгілі жақындап келеді. Осыны ескерген қор өкілдері ауданымызда тұрмысы төмен 50 отбасыға көмірлерін түсіріп берді. «Мен кезінде мемлекеттік қызметте жұмыс атқардым. Алайда, тағдырдың тәлкегіне түсіп, бірнеше апта бұрын бір аяғымнан айырылдым. Немерелерім де мүгедек. Осындай жағдайымызды ескеріп, жергілікті әкімдік болсын, кәсіпкерлер болсын қолдан келгенін аянып жатқан жоқ» – деген Есік қаласының тұрғыны, зейнеттегі ақсақал қоғамдық қордың көмегіне рахметін айтып, ризашылығын білдірді. Дәл осы жағдайда отырған басқа отбасылар да алғыстарын жаудырды. Айта кетейік, қоғамдық қор тек жағдайы нашар отбасыларға емес, көпбалалы жанұяларды да қысқы көмірмен қамтамасыз етті. Оның ішінде Есік қаласындағы Есеновтар отбасылық балалар үйі бар.
– «Қайырымдылық жасасаң, қайырын өзің көресің» – деген нақыл әрқашан көкірегімде сайрап тұрады. Бүгінде елімізде, оның ішінде ауданда қаншама көмекке зәру жандар бар. Барлығының жағдайын түзеу мүмкін емес, әрине. Десе де, осындай қиын шақта олардың қолтығынан демеу – біздің адамдық борышымыз – дейді қоғамдық қор өкілі Қымбат Құрманжанова. Расында да, көмірмен, азық-түлікпен тұрмысы төмен отбасылардың жағдайы жақсарып кетпесе де, бір жыртығы жамалды. Сондай-ақ, өмірде жомарт жандар бар екендігін сезініп, мемлекет оларды назардан тыс қалдырмағандығын ұқты.
Сардарбек НҰРАДИН.
