Партияішілік додада белсенділік танытқан үміткерлермен Nur Otan партиясы аудандық филиал төрағасы, аудан әкімі Қуанышбек Қашқымбаев кездесіп, жаңа саяси бәсекелестіктегі алғашқы қадамдарына құтты болсын айтты.

Кездесуде сөз алған аудан басшысы Праймериздің маңыздылығына тоқталып өтті: – Елбасымыз, партия төрағасы Нұрсұлтан Назарбаев «Нағыз патриоттар – елін мақтайтындар емес, оның кемшілігін көріп, түзетуге атсалысатындар» демеп пе еді. Расында, үгіт-насихат кезінде пікір-талас алаңында тамаша ойлар, кезек күттірмейтін мәселелер айтылды. Ақиқаты сол, мұндай дебаттар елімізді жаңа деңгейге көтереді. Бұл Ел Президенті Қасым-Жомарт Тоқаевтың «Халық үніне құлақ асатын мемлекет» тұжырымдамасының көрінісі – дей келе барша үміткерлерге ризашылығын білдірді: – Сіздер тарихи сәттің куәсі ғана емес, оған білек сыбана кіріскен тұлғалар ретінде тарихта таңбаланасыздар. Себебі, доданың алғашқы қатысушылары өздеріңізсіздер! Ендеше, дүбірлі доданың сәтті аяқталуымен баршаңызды тағы да құттықтаймын! Біз біріксек – көппіз. Ал көптің ісі қайырлы болады. Демек, Тәуелсіз Отанымызды гүлдендіру жолында жұмылайық, «Nurоtan»дықтар!

Кейіннен Nur Otan партиясы Алматы облыстық филиал төрағасы, облыс әкімі А.Баталовтың Алғыс хаттарын табыс етті.

Сөз алған праймериз қатысушысы, жас кәсіпкер Әлішер Сейтен жас буынға осынау мүмкіндік берген партияға алғысын жеткізді.

Ресми мәлімет бойынша ауданымызда 9080 «Nurоtan»дықтар бар. Соның ішінен праймеризге 99 үміткер қатысты. Оның 9-ы түрлі себептермен додаға қатыспады. 90 үміткер межеге дейін сүрінбей келді. Нүктесін 8514 партияластардың (94 пайыз) дауыс беру нәтижелері қойды. Айта кетерлігі, дауыс беру 100 пайыз онлайн форматта өтті.

Нәтижелер «Primaries2020» сайтында.

Қайнар ЖҰМАҒОЖА