Биыл – ақ найзаның ұшымен, ақ білектің күшімен жеткен Тәуелсіздік таңының атқанына 29 жыл. Азаттық үшін күресте бабаларымыз қан төгіп, елді жаудан қорғады. Алаш арыстары өмірлерін бәйгеге тікті. Желтоқсан көтерілісінің жастары мұзда алау болып жалындады.

Аға-әпкелеріміздің уақытында еңсе көтеріп, алаңға аяқ басқандары, еркіндікті талап еткендерінің жемісі – бүгінгі бейбітшілігіміз. Тәуелсіз мемлекетте еркін өсуіміздің себепшілерін есте сақтап, тағзым жасап, бейбіт күннің бағасына жетіп, қолда ұстап қалу – баршамыздың бүгінгі парызымыз.

Бабалар қанымен келген тәуелсіздік тұғырымызда мәңгі тұрақтауы үшін кез келген уақытта бір жеңнен қол, бір жағадан бас шығаруымыз керек. «Біріңді, қазақ, бірің дос, көрмесең істің бәрі бос» демекші, бір-біріміздің жақсылығымызды асырсақ, бізден абыройлы ел болмасы анық. Әрине, әлемді бағындыру үшін кішкентай әрбір тұрғынның жүрегінде үлкен мейірім болуы қажет. Қандасына мейірім танытып, мұқтаждығын өтеген-де, жасын сүртіп, иығынан демегенде ғана шын шыңдалып, беки түспекпіз. Ал бекіген елдің бола-шағын өзгелердің баянды көретіні хақ!

Еліміздің жалынды жастары бастарын бәйгеге тігіп, бодандық құрсауынан шығуға ұмтылған қыршын ерліктері бүгінгі тәуелсіз еліміздің жарқын істерімен жалғасын табуда. Тәуелсіздікті аңсау бар, оған жету және оны бағалап, сақтап қалу бар. Біз осы кезеңдердің үшінші сатысындамыз. Яғни, маңдайдағы бағымызды көздің қарашығындай сақтап, оны келешек ұрпаққа аманат ету – біздің асыл парызымыз.

Бахыт ДҮЗЕЛБАЕВ,

«Иманды жастар» еріктілер тобының мүшесі