Төтенше жағдай уақыты аяқталғанымен, карантин режимі әлі күнге сақталып келеді. Әсіресе, халық көп шоғырланатын орындарда карантин талаптарын қатаң сақтау – әрбір азаматтың міндеті.

Десе де, мойнымызда мұндай жауапкершіліктің барын көпшілігіміз ескере бермейміз немесе естен шығарып аламыз. Осы олқылықтың орнын толтыру үшін, әрі сақтық шаралары жайын жан-жақты түсіндіру мақсатында ауданымыздың еріктілері іске кірісті.

Аудан орталығы – Есік қаласында тұрғындар көп шоғырланатын, халыққа кезекпен қызмет көрсететін мекемелердің алдында: «Қазпошта» АҚ торабы, банктер мен тағы басқа да орындарда жиналған жұртты кезекте тұру уақытында сақталатын карантин тәртіптерімен таныстырып, сақтық шараларының алдын алу жұмыстарын жүргізді. Бетперде киюдің маңызы мен арақашықтық сақтаудың артықшылықтары айтылды. Тазалық сақтау, антисептик құралдарын пайдалану жайы да түсіндірілді.

Тұрғындар мен мекеме қызметкерлері еріктілердің бұл ісін мақұлдап, алғысын айтты.