Өңір спортының әлеуетін арттырып, болашақ спорт жеңімпаздарын тұғырынан түлетіп келе жатқан іргелі оқу орындарының бірі – аудандық № 2 балалар мен жасөспірімдер спорт мектебі. Бүгінде аталған оқу орнының түлектері республикалық додаларда топ жарып жүр.
Айталық, Абдугани Исмаилов жаттықтыратын мектебіміздің түлегі Айнур Ашимова 23 қарашада өткен әйелдер арасындағы республикалық чемпионатта 55 кг салмақ дәрежесінің қола жүлдегері атанды. Аудандық 2 балалар мен жас өспірімдер спорт мектебі ұлттық спорттың кеңінен қанат жаюына да өзіндік үлес қосып келеді. Оның дәлелі ретінде жақында ауданымызда өткен «Сонар-2020» республикалық турниріндегі жетістігімізді алға тартуға болады. Төле би даласын дүбірге бөлеген додада Сейтжан Бексұлтан, Жамбыл Досымжан сынды шәкірттеріміз «Қаршыға» мен «Құмай тазы» жарысынан 3-орын олжалады. Біз келер күнде жаңа белестерді бағындыра береміз деген ойдамын. Өйткені мектебімізде сан аламанда топ жаратын саңлақтар өсіп келеді.
Сонымен бірге кәсіпқой бокста жеңісті қадамдар жасап жатқан Ринат Баққожаұлы жаттықтыратын Баққожа Еркебұланға да сәттілік тілейміз. Желтоқсан айында 10 оқушымыз бокстан республика чемпионатының іріктеуіне қатысты.
Мектебімізде алдағы уақытта өтетін жоғары деңгейдегі аудандық, облыстық, республикалық жарыстарда шәкірттеріміз жүлделі болады деп сенеміз.
Мубарак МАМЕТОВ,
директордың міндетін уақытша атқарушы
