Спортты жанына серік еткен жастарымыз бүгінде еліміздің түпкір-түпкірінде өткен байрақты бәсекелерден жүлделі оралып, ауданымыздың намысын қорғап жүр. Әсіресе, былғары қолғап шеберлері аймақтық додаларда биіктен көрінуде.

Жақында Шығыс Қазақстан облысы Аягөз ауданында өткен Шығыс аймақтық біріншілікте 54 кг салмақ дәрежесінде өнер көрсеткен Әділет Тортубек  (бапкері Ерлан Ислам), 56 кг салмақта Жәнібек Таубек (бапкері Аркен Даутов) жеңімпаз атанды. ШҚО, Ақмола, Алматы облыстары мен Нұр-Сұлтан қаласының спортшылары қатысқан жарыста өздерінің шеберліктерін көрсете білді.

Ал бокстан ауданымыздың бас бапкері, халықаралық дәрежедегі АИБА төрешісі Тілек Манаптың бабынан шыққан Алижан Нұрқанат Түркістан облысы Шардара ауданындағы Оңтүстік аймақтық біріншілікте 66 кг салмақта қарсыластарынан оқ бойы озық шығып, жеңіспен оралды.

Осылайша, үш спортшымыз Атырауда сәуір айының 9-14 жұлдызы аралығында өтетін ҚР ақтық финалдық кездесуіне жолдама алды. Бұл кездесуде қарсыластарынан басым түскен былғары қолғап шеберлері Азия чемпионатында өнер көрсетеді.

– Қазіргі  уақытта спортшылар алдағы додаларға қызу дайындық үстінде. Атыраудағы ақтық ойында жеңіске жетіп, Азия чемпионатында еліміздің көк Туын желбіретуге барымызды саламыз – дейді Тілек Манап.

С.НҰРАДИН