Құла түзге құт қондырып, қызырлы Сөгеті-Нұра ауылының алғашқы қазығын өзі қағып, 30 жыл өзі басқарып, көркейген елді мекенге айналдырған, артына өшпестей із қалдырып, республикаға еңбегі сіңген қайраткер, Алматы облысының құрметті азаматы атанған ел ағасы Сағыныш Еспергеновті ауылдастары да құрмет тұтады. Сондықтан болар марқұмды еске алып, жыл сайын қазақ күресінен дәстүрлі турнир өтетіні.
Шелектегі аудандық 2 БЖСМ-нің басшысы, кик боксингтен әлем кубогінің иегері Елмұрат Қайыпжановтың ұйымдастыруымен 20-қараша күні басқа күрес түрлерінен артықшылығы басым бұл бекзада ұлттық күрестен 2009 – 2012 жыл арасында туылған жасөспірімдер арасында Нұра ауылының мектеп-интернатының спорт залында облыстық ашық турнир өтті. Сағыныш Еспергеновтің 95 жылдығына арналған бұл жарысқа Шығыс Қазақстан, Түркістан, Алматы облысынан, Алматы қаласынан және аудан округтерінен 13 команда қатысып, өзара бақ сынасты. Кілемде күш сынасқан кішкентай «Қажымұқандарға» Қазақстан Республикасының еңбек сіңірген бас жаттықтырушысы болған ардагер Мәлік Надірбеков, аудандағы спорт ардагерлері сәттілік тілеп, ақ тілектерін айтты.
Марқұмның балалары мен немерелері боз кілемде топ жарған балуандардың өздеріне тиесілі медальдарын тағып, диплом, бағалы сыйлықтарын табыс етті. Дәстүрлі жарыс келер жылы да жалғасын табатын болады.
Анарбек БЕРДІБАЕВ.