Қазіргі заманғы өндіріс ошақтарында жұмысшылар әртүрлі зиянды факторлардың ықпалында еңбек етеді. Солардың ішінде ең жиі кездесетіні – өндірістік шу.

       Шу – әртүрлі жиіліктегі және қарқындылықтағы дыбыстардың ретсіз қосындысы, ол адамның есту мүшесіне және жалпы ағзасына кері әсерін тигізеді.

    Мамандардың айтуынша, 85 децибелден жоғары шу деңгейі ұзақ уақыт әсер еткен жағдайда есту қабілетінің төмендеуіне әкеледі. Ал кейбір өндіріс орындарында бұл көрсеткіш 100–110 дБ-ға дейін жетіп, жұмысшылардың жүйке, жүрек-қан тамыр, ас қорыту және эндокриндік жүйелерін зақымдауы мүмкін.

      Тұрақты шу адамды тез шаршатады, ұйқының бұзылуына, ашушаңдық пен еңбек өнімділігінің төмендеуіне себеп болады. Мұндай жағдайда жұмыс орнында жазатайым оқиғалардың орын алу қаупі де артады.

      Шудың зиянды әсерін азайту мақсатында кәсіпорындарда санитариялық-гигиеналық талаптар қатаң сақталуы қажет. Ең алдымен, шуды шағаратын механизмдерді оқшаулау, жабдықтарға уақтылы техникалық қызмет көрсету, дыбыс сіңіретін қаптамалар орнату, жұмысшыларды жеке қорғаныс құралдарымен (құлаққап, тығын) қамтамасыз ету маңызды. Сол сияқты шудың көзі болып табылатын құрылғыларды басқаруды барынша қашықтықтан жасап, жаңа технологиялық үрдістерді қолданысқа енгізу.

      Сонымен қатар, еңбеккерлердің денсаулығын бақылау үшін медициналық тексерулер мен шу деңгейін өлшеу жұмыстары тұрақты түрде жүргізіліп отыруы тиіс.

       Өндірістік шудың адам ағзасына әсері алғашқы кезде байқалмауы мүмкін, алайда ұзақ мерзімде оның зияны орасан. Сондықтан әрбір жұмысшы мен жұмыс беруші өз қауіпсіздігін қамтамасыз етуге мүдделі болуы керек.  Шуды азайту – денсаулықты сақтау кепілі.

 Еңбекшіқазақ аудандық СЭББ

 басшысының орынбасары Д.Бақберген