Терінің саңырауқұлақ аурулары – теріні, тырнақты және шашты зақымдайтын саңырауқұлақтан туындаған жұқпалы аурулар, оның ең көп тараған түрі - дерматомикоздар. Сондай –ақ инфекия жұққан беткі қабаттармен немесе заттармен жанасу арқылы адамнан адамға берілетін ауру. Бассейндер, сауналар немесе киім ауыстыратын бөлмелер сияқты қоғамдық орындарда инфекция тез жұғуы мүмкін.
Жұқпа көзі – инфекцияны жұқтырған үй және ауылшаруашылық жануарлар (ит, мысық, ұсақ мал, ірі қара) немесе ауру адам саналады.
Аурудың белгілері көбінесе денеде, бас терісінде және тырнақтарда пайда болуы мүмкін. Ауру біртіндеп қызарған дақтардың пайда болуынан басталып, кейін көптеген ошақтарға өтеді.
Дерматомикоз науқас адаммен немесе жануармен тікелей байланыста болған кезде, сондай-ақ науқас адамның заттарын (киім, бас киім, тарақ, қайшы, орамал, төсек-орын) пайдаланған кезде жұғады.
Жиі жағдайда қабыну белгілері терінің ашық жерелерінде, бастың шаш өсетін бөлігінде, сыртқы жыныс органдарында, өкше терісінде дамиды.
Тері мен бастың трихофетиясы көбіне балалар мен жасөспірімдерде байқалады.
Аурудың алғашқы белгілері науқаспен (қолданған затымен) немесе жануармен қарым қатынастан кейінгі бір апта ішінде дами бастайды.
Тері саңырауқұлақ ауруларының негізгі белгілері:
- теріде гиперемиялық (қызарған) аймақтардың пайда болуы;
- аяқ-қолдың тырнақ пластиналарындағы патологиялық өзгерістері;
- теріде қызыл дақтардың, қабыршақтардың пайда болуы;
- терідегі көпіршіктердің пайда болуы;
- дененің қышуы және қызуы.
Тері саңырауқұлақ ауруларының алдын алу мен сақтық шаралары:
- жеке бас гигиена ережелерін сақтау, отбасының әрбір мүшесінде жеке гигиена заттарының болуы;
- қоғамдық орындарда жалаң аяқ жүрмеу;
- қоғамдық орындарға барғаннан кейін қолды сабынмен мұқият жуу;
- бөтен адамдардың бас, аяқ және іш киімдерін кимеу, сүлгісін пайдаланбау;
- іш киімдеріңіз бен аяқ киімдеріңізді таза ұстау;
- мейлінше табиғи матадан тігілген киімдерді кию;
- бөтен адамдардың маникюрге арналған заттарын, тарағын, шаш қыстырғыштарын пайдаланбау;
- аулаңыздағы үй және ауылшаруашылық жануарлардың денсаулығын үнемі қадағалап, тері жабындысын саңырауқұлақтық зақымдануға қарап -тексеріп отыру.
Еңбекшіқазақ аудандық
СЭББ басшысының орынбасары Д.Бақберген
