Жақында аудандық кітапханада «Тәуелсіздігіміздің 30 жылдығына – 30 кітап» рухани-мәдени акциясы аясында ақын, жазушы, журналист, Қазақстан Жазушылар одағының  мүшесі Сәуле Досжанованың  «Қасірет пен тағдыр» романы оқырман талқысына салынды.

Жазушы шығармасында социалистік режим құрбандарына айналған Семей өңірі тұрғындарының қасіреті айтылады. Рас, Семей полигоны жабылса да, зардабын әлі тартып келеміз. Жазушы кейіпкері Аяулымның тағдыры арқылы осы қасіретті оқырманға жеткізе білгендігін жиынға қатысушылар әр қырынан баяндады. Талқылауға қатысқан «Еңбекшіқазақ» газетінің бас редакторы Хайролла Ахметжанов Тәуелсіздік жылдарында өзінің антиядролық қозғалысқа белсене қатысқандығын жас оқырмандарға баяндап, Семей ядролық сынақ полигоны жабылғанымен, оның сызаты мен сырқатынан арыла алмай отырғанымызды, кез келген ядролық жобаға бейжай қарауға болмайтындығын тіліне тиек етті. Ал ақын Шаяхмет Құсайынұлы Семей ядролық сынақ полигонының зардабы жайлы өлеңін оқыды. Халқымыздың тағдыр талайын суреттеген бұл шығарма  әлі  талай  оқырман талқысына арқау болады деген ойдамыз.

Е.Асыл.