Құрметті аудан тұрғындары мен қонақтары!

Бұл мереке баршамыз үшін қастерлі де қадірлі. Себебі, Тәуелсіздік – ата-бабаларымыздың жүздеген жылдармен өлшенетiн арман-аңсарының жүзеге асқан ақиқаты.

Осыдан 30 жыл бұрын саналы түрде еңсемізді тіктеп, ұлттық болмысымызды сақтау арқылы азаттық таңдауын жасадық. Әйткенмен,  түлкі бұлаң тарихтың нешеме бұрылыстарында ел азаттығы үшін талай тарланның тақымындағы тер кеппеді. Ат үстінде өткен ғасырлар көп болды. Тағдыр талайында сан сүріндік, сан құладық, сонда да ақ сәулесін шашқан арманымыздан адаспадық.

1986 жылы еліміздің жалынды жастары бастарын бәйгеге тігіп, бодандық құрсауынан шығуға ұмтылған жанкешті ерліктер жасады. Бұл бостандыққа басқан қарышты қадам болды. Енді сол ерлік жемісі бүгінгі Тәуелсіз еліміздің жарқын істерімен жалғасын табуда.

Әрине, 30 жыл – тарих таразысында аз уақыт шығар, әйткенмен, орда бұзар жасқа жеткен егемен еліміз осы мерзім ішінде асқаралы асу, биік белестерді бағындырып үлгерді. Осынау ұлан-ғайыр өлкеміз дербестік жолында сан қилы кезеңдерден өтті. Сын сағатында сынбай, жетістікке масаттанбай, бірлікте ұйымдаса білудің нәтижесінде биік белестерді бірге бағындырдық. Маңыздысы, шекарамызды шегендеп, алты құрлыққа Тәуелсіздігімізді жарияладық. Бабалар жолымен үндесіп жатқан ұлттық құндылықтарымызды тұғырына қайта қондырып, қазақстандықтардың өмірі мен оның бостандықтарына, еркіндігі мен дамуына Ата заңмен кепілдік берілді. Бүгінде мемлекеттік саясат – әрбір ел азаматының игілігі үшін жұмыс атқаруда.

Іргелі ауданымызда да Тәуелсіздік жылдарында жеткен жетістіктер ауыз толтырып айтарлықтай. Аграрлы саланың ауқымы артып, экономикамыз еселеп өсіп келеді. Тартылған инвестиция көлемі де көңіл қуантарлық.

Бұл жетістіктердің астарында мыңжылдықтар мұраты – Тәуелсіздік дәуірі жатыр. Біз мұндай жеңістерге Елбасымыздың, Ел Президенті Қасым-Жомарт Кемелұлының сарабдал саясаты мен еліміздің бірлік туының астына біріге алғандығының арқасында жеттік. Қай тарихты парақтасақ та, біз қашанда алауыздыққа қарсы тұра білген елміз. «Үдеудің сыры – бірлікте. Жүдеудің сыры – алауыздықта» деп Елбасымыз атағандай, осы жолдан айнымасақ, алар асуларымыз әлі алда.

Енді жер асты кенге, жер үсті төлге толған осынау ұлан-ғайыр өлкенің бүгінгі иесі де біз, киесі де біз: Қазақстан дейтін Тәуелсіз мемлекет. Демек, ТӘУЕЛСІЗДІК дейтін қастеріміздің қадірін қашырмай, көздің қарашығындай сақтай білу – ортақ мақсат.