Айдың басында Шелек өңірінде, ал аяғында Есік қаласында қоғамдық қабылдау өткізетін жұмыс кестесіне сай дүйсенбі күні аудан әкімі Әлібек Жақанбаев тұрғындарды қабылдады.

Аудан әкімдігінің барлық бөлім басшылары, әкімнің орынбасарлары төрт көзі түгел отырып, халықтың назын тыңдады. Қабылдауға келгендер арасында ауыл тұрғындарының жанайқайын жеткізген жандар да, жеке мәселесімен келген азаматтар да болды. Мысалы, Шелек өңірінен келген Замзагүл Мамырбаева Қайыпов мектебіне қосымша салынып жатқан жапсарма құрылыстың тарлығын, онда небәрі 15 кабинет болатынын, мектепте асхана мен спортзалдың да жоқтығын айтты. 320 орындыққа шақталған мектепте бүгінде 887 оқушы білім алып жатыр. «300 орынға есептелген жапсарма ғимараттың өзін қосқанда 2-3 жылдан кейін үшауысымды мектепке қайта айналып кетеді», – деген аудан әкімі құзырлы мекеме мамандарымен ақылдасып, жапсарма ғимараттың көлемін кеңейту мәселесін көтеретінін айтты. Сондай-ақ мектеп маңынан спорт алаңын ашуға да аудан басшысы өз уәдесін берді. Замзагүл Мамырбаева көтерген тағы бір мәселе – ауылдық жерлерде дәрігерлердің тұрақтамайтыны. Осы орайда ауылдық округ әкімі Марат Сүгірбековке жергілікті жерден білікті кадр табу тапсырылды. Сондай-ақ иесіз бос тұрған ғимараттарды халық игілігіне қолдану, жер теліміне қатысты сұрақтар, ауылдық жерлерде спорт пен өнер мектептерін ашу, қоғамдық көліктер, жол жүру ақысының артуы сынды мәселелер көтерілді.

Бөлек ауылдық округінің тұрғыны, жақында жүкті жұбайынан айырылған азамат, алты баланың әкесі балаларға әлеуметтік көмек көрсетуді сұрай келген екен. Әлібек Әскербекұлы жаңа жылға дейін балаларға қажетті киім-кешек алып беріп, бұл азаматтың бастап қойған үй құрылысын көктем шыға толық аяқтап беруге уәде етті.

Қ.МҰРАТҚЫЗЫ.